لكن برلمانيون من حزب التجمع الوطني للاحرار ومعاهم برلمانيو شي احزاب كان انتقادهم كبير. هاجم 7 نواب من الاحرار فتدخلاتهم الوضعية اللي كتعيشها ومشاكل لمغاربة مع هاد الشركة خاصة ففصل الصيف وجبدو نقاط كثيرة٬ لكن المثير ان برلماني من الحمامة قال لعدو قدام وزير النقل “كون كنتي فالقطاع الخاص كون طرتي بسباب نتائج خدمتك”. يعني ان عدو ما يصلاحش يكون رئيس مدير عام للخطوط الملكية المغربية
برلمانيون اخرون سبق وهاجمو لارام ومديرها فاكثر من مناسبة. جبدو ليه رداءة الماكلة كيف دار عادل دفوف برلماني البام قبل اشهر. جبد ليه كذلك شركة وحدة من فاس تعاقدات معاها لارام باش تعطي الوجبات.
نائب من المعارضة قال ل”كود” عدو احتاقر البرلمانيين باش عوض ما يعطينا ارقام جاب لينا تصاور بحال ايلى حنا توريست. الصحافة حتى هي تجبدات فهاد الجلسة. برلمانيون لمحو باللي صحف مغربية كتجامل “لارام” وكتفادى انتقادها. يعني القضية فيها “إن”.
دابا كاينة قضية اخرى هي غلاء التذاكر فالصيف خاصة فشي وجهات. كاينة حملة بداوها مغاربة العالم ضد “لارام”. يعني القضية غادية وتزاد تصعاب للمدير الجديد. مشاكل كثيرة غادية تبان وخاصها حل لشركة كتقول باللي استرجعات 70 بالمائة من مسافريها اللي كانو قبل “كورونا”. يعني لفلوس دايرة خاص الخدمات كلها تقاد كثر