كود سبور //

غيلتحق مدرب حراس الوداد الرياضي علاء المسكيني بصفوف حسنية أكادير، باش يعمل فالطاقم التقني ديال المدرب البرازيلي ماركوس باكيتا لي وقعات معها الحسنية باش يدربها فمكان عبد الهادي السكتيوي.

مصادر مطلعة كشفت لكود أن علاء المسكيني غيكون هو المدرب ديال حراس المرمى الجديد فحسنية أكادير، وأكدت أن المسكيني غيبدا العمل ديالو فتحضير حراس الفريق السوسي هاذ اليوم، وأن التحاقو بالحسنية جا باستشارة مع المدرب ماركوس باكيتا.

وكتجي المغادرة ديال مدرب حراس المرمى علاء المسكيني للوداد الرياضي من بعدما غادر المدرب وليد الركراكي الفريق الأحمر، بحيث كان الركراكي هو لي جاب المسكيني للوداد فالعام الماضي، وبالتالي ففضل حتى هو يغير الفريق ويلتحق بحسنية أكادير باش يبدا تجربة جديدة، مع العلم أن المسكيني كان من الناس لي ساهمو فتتويج الوداد بالبطولة والعصبة والدليل هو التألق ديال الحارس رضى التكناوتي الموسم الماضي.