كود الداخلة//

حالات الفوضى والسيبة التي يعيشها مطار مدينة الداخلة مازال مابغاتش تسالي. فوخا العالم كامل ولى كيهضر على المدينة خاصة بعد الاعتراف الأمريكي بمغربية الصحراء، وشركات دولية كبيرة باغية تستثمر فالمدينة، إلا أن مايعيشه مطار الداخلة من وقائع وانفلاتات من حين الى آخر كيعطي مؤشرات خايبة على مستقبلها، وكيشوه السمعة ديال المدينة لي باغيين نرجعوها وجهة سياحية كبيرة وقطب اقتصادي واعد، وكيشوه حتى السمعة ديال البلاد كاملة فظل توافد مئات المستثمرين الاجانب ورجال كبار فدول أجنبية على المدينة.

فحسب مصدر محلي لـ”كـود”، جوج ديال شيافر الطاكسي دابزو نهار السبت بالليل فباب ديال مطار الداخلة بالبونية والسبان من السمطة التحت أمام مرأى ومسمع مئات المسافرين لي جاو للمدينة، وهادشي كامل كيقول مصدر “كـود” بسبب سائح أجنبي كان باغي يمشي من المطار للفندق لي غاينزل فيه فالداخلة، ودابزو عليه جوج شيافر ديال الطاكسيات.

بحال هاد السلوكات والممارسات المشينة هي لي كتشوه صورة بلادنا. كيفاش حنا كنسوقو فالاعلام على أن الداخلة “جنة مغربية” فالصحراء المغربية، والعالم كيهضر عليها، وكبريات الشركات الدولية كتسابق باش تستثمر فيها، ويجيوْ جوج شيافر ديال الطاكسي ويبهدلو صورة البلاد على عشرين ولا خمسين درهم باش يهزو سائح أجنبي من المطار للفندق لي كيتواجد في فوسط المدينة.

الملف ديال الشجار ديال هاد جوج شيافر الطاكسي كيقول مصدر “گـود” فيد البوليس لي فتحو تحقيق فالموضوع، وخاص حتى السلطات المحلية تدخل بحزم باش تنظم هاد الفوضى لي واقعة فمطار الداخلة، راه صورة البلاد هادي كتبهدل!.