كود كازا//

الشوهة وصافي ! فيديو حطاتها الممثلة السعدية لديب فالأنستكَرام قبل ما تحيدها كشفات على النيفو المتدني ديال الممثلين فالجزء الثاني من مسلسل سلمات أبو البنات، اللي غتعرضو قناة MBC5 هذ رمضان.

الفيديو، اللي عرضات كواليس التورناج ديال وحدة من حلقات المسلسل، دار بووم على مواقع التواصل الاجتماعي، وخصوصا فيسبوك، بحيث بارطاجاوه المتابعين على نطاق واسع واخا تحذف، وضحكو مزيان على الممثلين اللي كيتلعثمو وبانو ماضابطينش السيناريو مزيان، وهذشي طبعا بديهي حيت حتى واحد فيهم ما تخرج من معهد التنشيط المسرحي أو قاري التمثيل فالأصل.

وظهرات فالفيديو عارضة الأزياء اللي كتمثل لاول مرة، سلمى صلاح دين، مع عارضة الازياء سناء مبتسم اللي هذا ثاني عمل كتمثل فيه، بالإضافة للمغني البشير عبدو، وبانو كاملين كيفاش كتهرب ليهم الهضرة وماشادينش الحوار ديالهم، فيحين المخرج هشام الجباري كيوريهم آش يقولو وكيفاش يتبوزيسيوناو، بالخوشيبات.

وبحال هذ العام بحال العام اللي فات، قناة MBC5 الخليجية ممكن دايراها بلاعني، او واقيلا كتعمد ماتدير حتى مجهود لضبط جودة الانتاج ديال الأعمال المغربية، بل على العكس، كتفرق الملاين باش تزيد تنزل النيفو للحضيض، وتكرس الرداءة والابتدال والميوعة فأعمال كتعزز ثقافة السواعدة على حساب التمغربيت.

https://www.facebook.com/watch/?v=805469397047373