كود الرباط//

الغوات والتهجاج بزنقة الأشعري بحي أكدال بالرباط، واحد الحارس ديال عمارة نزل لقى عاملة النظافة التابعة للبلدية كتشطب و جامعة شي كومة ديال الأزبال حدا العمارة باش تديرها فالبركاصة ملي تسالي.

تهجم الحارس على عاملة النظافة، وقالها: جمعي علينا زبلك من هنا، وملى قالت ليه ما تغوتش عليا ناض كيحيح عليها و كيغوت بجميع الشتائم و السب و كيقول كلام نابي جدا: “نتي راكي بحال الزبل اللي كتجمعيه..اللي كيجمع الزبل راه غير زبل”.

المارة ما عجبهومش الحال و تجمعو عليه رجالات الدرب و إسطاضمو معاه، وقالو ليه: ” ما تحكرش عليها و خليها تدير خدمتها”. اما الحارس فكمل كيعاير وكيشير على عباد الله: ” هاديك راه غير زبالة و دخلو سوق راسكم أ الفضوليين”.

وماسكت الحارس، حتى هددوه بالبوليس.

هاد السلوكات خايبة والحكرة ما مزياناش. وهادشي كيعني انه باقي عندنا ناس متخلفين كيعتابرو العمل في نظافة الشوارع و المرافق العمومية إهانة، في حين هذا عمل شريف و نبيل جدا وكيتعتابر وظيفة عمومية.

خاصنا نحييو جميع عاملات و عمال البلدية اللي سهرو على نظافة الأحياء و الشوارع في ظروف هاذ الحجر والجايحة، وعرضو حياتهم للخطر و الإصابة بالوباء وما بخلوش علينا بالجهد ديالهم.