كود فاس///

جمعية “مبادرات لحماية حقوق النساء”، جمعية كتسير مركز البطحاء لتمكين النساء بمدينة فاس، وكيتعتابر هاد المركز نمودجي، وكيتعطى بيه المثل، وكيتعطى ليه التمويل من صندوق الأمم المتحدة للسكان.

من المفروض هاد المركز يكون كيحمي العيالات في وضعية هشاشة والمعنفات، ولكن حسب بعض العمال السابقين كيقوم هو بتعنيف معنوي للأطر والعاملات ديالو وكيتكرفص عليهم.

وصرح عثمان أحد العاملين السابقين، ومتضرر من عدم دفع راتبو لمدة أربعة أشهر لـ”كود”: كاين تماطل في دفع صاليراتنا، وكيبقاو علينا بسير وآجي السيمانة الجايا تخلصوا الشهر الجاي تشدو كولشي هادي تقريبا عام.

واضاف عثمان لـ “كود”: راهم مامخلصينش عليا حتى الضمان الإجتماعي، ومكنستافدش من التعويضات. وكاين مستخدين آخرين معندهمش حتى عقد عمل.

“كود” حاولات تتاصل بالجمعية وتاخد رأيها فالموضوع، ولكن ماردوش فالتليفون.