نجوى المالحي-كود//

المغنية منال بنشليخة مولات أغنية “Slay” مسحات تصاورها مع راجلها من انستكرام ديالها وكتبات “حتى حاجة ماكتدوم للأبد” بابنگليزة، وموراها حطات ستوري فيها “قولو لي قصة الحب ديالكم ونخبركم بديالي” وبان أنها كتوجد لأغنية جديدة.

معلقين قالوا أنها اختارت دير البوز بحياتها الشخصية لي ديما كتقول متدويش عليهل وخير مثال الصداع لي ناض في موازين ملي مابغاتش تدوي على الحمل ديالها وقبل منو تزوجات بلاما تعرض على صحاباتها المؤثرات لي شاركو معاها في فيديو كليب “slay” ولي ساهمو بطريقة غير مباشرة في رفع نسب مشاهدات الكليب.

الأغنية غادي تكون ديال الحب وغدا الثلاثاء غادي تقدمها في كازا. اخر بوسط لي حطات هو “Une histoir D’amour NTA”. الا كان دارت الهندة ديال انها مخاصمة مع راجلها باش تبوزي راه مجهدة فالتسويق وتعلمات من الكبار فهاد المجال، والا كان بصح تفارقات هي وراجلها نتمناو ليها ايام افضل.