عفراء علوي محمدي- كود//

قال محمد بنعجيبة، مدير مركز تحاقن الدم، بللي المخزون ديال الدم انتعش بشكل كبير فهذ جوج أسابيع الأخيرة، وبشر بللي وصل سقف التبرعات ديال المغاربة بالدم بين 900 حتى ل2700 تبرع فاليوم الواحد.

وأكد بنعجيبة، فتصريح ل”كود”، بللي هذشي بفضل النداءات والحملات اللي دارها المركز من أجل التحسيس بأهمية هذ المادة، بعدما عرف التبرع بيها واحد النقص كبير بزاف مللي علنات الدولة على حالة الطوارئ، ومابقاوش الناس يخرجو من ديورهم، وهذ النقص وصل لأقل من 200 متبرع فاليوم الواحد فبداية الحجر الصحي.

وكشف بنعجيبة بللي أغلب الناس اللي جاو يتبلعو بالدم كانو هوما عناصل الامن الوطني والوقاية المدنية، بحكم أن السلطات دارت حملة موسعة فصفوفهم باش توعيهم باهمية التبرع، والأمر كيتعلق كذلك بالأطر الطبية من اطباء وممرضين، ثم مواطنين اللي سرقو بعض الوقت وجاو تبرعو لمراكز التبرع القريبة من محل سكناهم.

وبالنسبة للورقة اللي كان دار مركز تحاقن الدم باش يسمح للناس يخرجو ويجيو من أجل التبرع، قال أنهم ماعتمدوهاش بزاف، بحكم أن الناس جاو طواعية بدونها، فالوقت اللي كانو يخرجو من الدار باش يتقضاو أو للتطبيب أو لقضاء أغراض ملحة.