كريم الشركي – كود //

قالت جريدة “إل باييس”، أن الصبليون واحلين فعملية اعادة القاصرين المغارية اللي دخلوا لسبتة هاد الصيف اللي فات، بعدما قطع المغرب تعاونه مع الإسبان فهاد الملف.

وقالت الجريدة أن السلطات الإسبانية خاصها تستعلم على الوضعية الاجتماعية ديال عائلات هاد القاصرين فالمغرب، باش تحطها فالضوصي ديال الترحيل اللي كتقدموا للمحكمة، وهو الإجراء اللي مادارتوش سابقا وتسبب فإيقاف عملية الترحيل.

ودابا ملي طلبات من المغرب يعاونها في معرفة الوضعية الاجتماعية لأسر القاصرين، “ماتسوقش ليها المغرب” لحد الساعة، حسب ذات المصدر الإعلامي الإسباني، وهادشي غيخلي عملية الترحيل مجمدة حتى لإشعار آخر، حيث بقي أزيد من 400 قاصر من اللي دخلو فالصيف خاص يتم ترحيلهم.