عفراء علوي محمدي- كود//
الرابور حليوة دار فراسو الضحك بالمزيان بتراكو الجديد “القدس” لي لونصاه اليوم فلاشين ديالو فيوتوب، بحيث بان فالفيديو كليب لابس تيشورت مكتوبة فيه “فلسيطن”.
هذي غلطة قدها قداش وماعرف واش دارها بلعاني باش يجيب البوز على ظهر القضية الفلسطينية، أو ماردش البال.
ولوا حليوة عليه راية فلسطين وكَلس يسب فاليهود وهو راكب ففلوكا وسط البحر، وحلف حتى يحررها ولو بالغنى، وخا “ماكتبها حتى مقادة بقاليه غير يحررها”، كيف قال واحد المعلقين.
وبزاف ديال رواد مواقع التواصل الاجتماعي شبعو فيه تنمر وانتقاد بسباب هذشي، وولات سميتو هي اللولة فالتراند ف”فيسبوك”، كأكثر إسم كيقلبو عليه الناس.
