كود كازا //

فمجلس وزراء استثنائي اليوم الاحد 25 اكتوبر تم الاعلان فالصبليون على حالة الطوارئ ل15 يوم فكاع مناطق لبلاد باستثاء جزر الكاناري اللي الوضعية الوبائية فيها ماشي خطيرة. رئيس الحكومة شانشيز قال فمؤتمر صحافي بعد هاد القرار باللي الوضعية صعيبة بزاف فالبلاد وباللي هاد حالة الطوارئ هي الوسيلة الاكثر فعالية لمحاربة هاد الجايحة: كورونا فيروس.

هاد حالة الطوارئ كتعني ما بقى حد يتحرك بالليل الا لسبب قاهر. ممنوع التحرك من 11 الليل حتى الستة الصباح. وما يبقاش حتي التنقل بين مدن الاقاليم المستقلة اللي عددها 17 بالاضافة الى سبتة ومليلية المستعمرتين. غير هاد القرار كيبقى بيد الحكومات الجهوية.  طبعا كناريا ما داخلاش فهاد الشي

الحكومة خاصها تمشي للبرلمان باش تاخد الموافقة. هي باغياها حتى 9 ماي اللي جاي. هاد الشي خاصو اغلبية. وهادا اللي غادية تقلب عليه حكومة ائتلافية يقودها الحزب الاشتراكي “بي سو وي” ومشارك معاه اليسار الراديكالي الجمهوري “بوريموس”