كود اسماء غربي ///

اعلان بنعرفة عدم ترشحو للانتخابات التشريعية اللي غادية دار فالمغرب الشهر الجاي عطى الميزاج العام فحزب العدالة والتنمية. حزب واخا خرج عزيز الرباح فحوار مع اسبوعية “الايام” كيقول باللي غادي يجي فالرتبة الاولى٬ فتصرف الرباح نيت وبالاخص بنعرفة كتقول عكس هاد الشي. فيها باللي كيوجدو للخسارة.

قرار بنعرفة بعدم الترشح للانتخابات التشريعية فيه هروب وفيه تأثير على الميزاج العام للحزب كيف قلنا. نقارنو بين هاد التصرف وبين تصرف مماثل دارو رئيس الحكومة السابق والامين العام لنفس الحزب عبد الاله بنكيران ف2016.

بنكيران كيف دكرو كان اول واحد علن على خوضو الانتخابات التشريعية. وفق مصادر “كود” فحتى الوزير المنتدب فالداخلية انذاك الشرقي الضريس وصلو لخبار وهو فالعيون. سمعها وضرب الطابلة احتجاجا. ما كانش متوقع هاد الشي.

طبعا بنكيران ما دارش حملة وصاط فمقاعد سلا. كانت قيادات الحزب كلها تقريبا تبعاتو وترشحات باستثناء مصطفى الرميد اللي كان بصفتو وزير العدل كلفو الملك يشرف على سير الانتخابات مع وزير الداخلية حينها محمد حصاد.

ترشح رئيس الحكومة السابق شجع الحزب ومشاركتو فالحملة الانتخابية هزات المورال للمرشحين وولاو كيتسابقو عليه باش يشارك فالحملات الانتخابية وفالاخير ربح واخا كلشي كان ضدو. جهة فالدولة طلقات ولد زروال ودارت مسيرتو المضحكة ودارت امور كثيرة ما قداتش توقف فوز المصباح.

دابا بنعرفة ما مرشحش. الوزرا معاه السابقون او الحاليون غالبيتهم ما مرشحين كيف خرج فلائحة مرشحي 8 جهات من اصل 12 . الحزب كتحس بيه بدا يقتانع بالهزيمة.