عفراء علوي محمدي- كود//

لونصات “أوكسفام المغرب”، فهذ شهر يونيو، مشروع “بركة: شباب ضد العنف”، لمحاربة العنف ضد النساء، بحيت اعتبرات أن النساء فجزء كبير من مجتمعنا المغربي الذكوري مازال كيعانيو.

وقالت منظمة أوكسفام اللي هي اتحاد دولي لـلمنظمات الخيرية كيتركز على تخفيف حدة الفقر فالعالم، أن 2 عيالات من أصل 3 تعرضو للعنف فهذ 12 الأشهر الأخيرة، منهم 70,7 فالمية بين 15 و19 لعام.

والبدية غتكون مع جهة مراكش آسفي، بحيث غيتم إشراك المنظمات ديال المجتمع المدني والفاعلين العموميين فالجهة باش يغيرو السياسات العمومية ويخليوها تساعد هذ النساء المعنفات.

وغيدفع المشروع الشباب باش يشاركو من أجل محارمة كل أشكال العنف ضد النساء والفتيات، من خلال الفن والثقافة، لتكريس مبدأ المساواة بين الجنسين ومحاربة العنف ضد المرأة.

وفلقاء غيجمعهم ف25 و26 و27 يونيو فمراكش، الشباب المهتمين غيحاولو يديرو محتوى سمعي بصري فهذ الشأن.

وهذ المشروع غيجي بشراكة مع جمعية كَورارا للثقافات والفن، وفيدرالية حقوق النساء بجهة مراكش آسفي، بدعم من الاتحاد الأوروبي على مدى 27 شهر.