الرئيسية > آراء > ايه العقوبات و الغرامات هي لي كاتصلح لينا ! حيت مازال خاصنا شي ميات عام باش نوعاو بأهمية القانون و ننضابطو ليه ! وفي انتظار يكون الوعي ماغانبقاوش مكتفين كانشوفو السلوكات اللاحضارية ‎
16/12/2017 17:00 آراء

ايه العقوبات و الغرامات هي لي كاتصلح لينا ! حيت مازال خاصنا شي ميات عام باش نوعاو بأهمية القانون و ننضابطو ليه ! وفي انتظار يكون الوعي ماغانبقاوش مكتفين كانشوفو السلوكات اللاحضارية ‎

ايه العقوبات و الغرامات هي لي كاتصلح لينا ! حيت مازال خاصنا شي ميات عام باش نوعاو بأهمية القانون و ننضابطو ليه ! وفي انتظار يكون الوعي ماغانبقاوش مكتفين كانشوفو السلوكات اللاحضارية ‎

سهام البارودي كود /////

أول مرة غانسافر لتركيا تصدمت من حاجة وحدة هي مايمكنش ليا نقطع الشانطي من ما بغيت و بلي ماكاينش داكشي ديال قطع منين مابغيتي و الطوموبيل راه غاتوقف و لا تنقص السرعة و تخليك دوز ! آ ماكاين غير طحن ! لي داز بوه من شي بلاصة غير مخصصة للراجلين غالبا تقدر طحنو شي طوموبيل ( هادي غييييير تويركيا) ! بلا مانهضرو على دول أخرى فحال سنغفورة لي كاتفرض عليك تخلص خطيا لا قطعتي من غير ممر الراجلين و لا مابغيتيش تخلص الخطية كايديوك تحاكم و دوز الحبس ! ايه الحبيبيس آ وليدي لا قطعتي من ما گال ليك راسك, و هاد الخوف من العقوبات و الغرامات كايخلي مواطني هاد الدول كي النمل عايشين في نظام و انتظام.

عندنا حنا و حيت مولفين السيبة و الشتيف فالشانطيات، القرار ديال غرامة 25 درهم لي بدا التطبيق ديالو هادي يوماين خرج لينا ثلاتة د أصناف ديال المغاربة، الصنف الأول: دوك مساخط الواليدين الاختصاصيين فالبكا و الشكا لي أي حاجة وقعات كايلصقوها فالدولة صحاب” المواطن مسكين مالقا ماياكل و غايخلص 25 درهم للدولة” و الصنف الثاني لي كايضحك و يستهزأ من القرار و واحد الصنف ثالت عند بالو هوا العايق و الفايق زعما ” الدولة تبحث على سد عجز الميزانية عبر فرض ضرائب جديدة على المواطن المقهور”

و هاد الاصناف بثلاتة خاص لي يشدهم و يبدا يصاطح ليهم فالريوس هاك بالاك هاك بالاك!

واك واك آش جاب الفقر لقطيع الشانطي ؟ آش جاب الميزانية لقطيع الشانطي ؟ واش هاد الفقير لي ماعندوش خمسميادريال ماعندوش حتى العينين و الدماغ باش يقلب على ممر الراجلين و يقطع منو و يهني راسو و يهني الناس؟ واخا آ دادا الفهيم، حنا نگولو الدولة تبحث عن سد عجز الميزانية بفرض ضرائب جديدة و ديك الهضرة ديال القهاوي د التيرسي، ايوا كون قافز نتا و ماتخليهاش تدي من عندك تا شنتيفة باش تنقي ضراسها ! كون قافز و قطع من ممر الراجلين و هنينا.

وا شحال كانطيرو فالأعذار ! واشحال فينا ديال الفهامات الخاوية ! هادشي كامل باش بنادم يبقى مع راساتو كايشتف فالشانطي على خاطرو و يقطع منين ماگالها ليه مخو بلا مايتحاسب معاه تاواحد !

مافهمتش علاش أي حاجة عزيز علينا نفهموها من زكها و نتفلسفو فيها بزاف، دابا نورمالمو هاد القرار خاصو يرحبو بيه الناس علاش ؟حيت اولا غايحميهم كراجلين ! غايعلمهم الانضباط ! و غادي يحميهم لاكانو عندهم الطوموبيلات و كايعانيو من الراجلين لي يمكن يخرجو ليك من أي قنت و لا ضربتيه كاتولي نتا لي واحل فيه! فين كاين المشكل مافهمتش ؟

قرار قانوني و جاري بيه العمل فبزاف ديال الدول لي كاتحتارم راسها علاش حنا بوحدنا لي غانتشكاو منو ؟

حيت باغين نبقاو مرتاحين فالتخلف ديالنا ؟

حيت باغين التغيير و لكن ماباغينش نبدلو مجهود باش نطبقوه على ارض الواقع؟

حيت كلشي كايغوت واااا حناااا دولة متخلفة بناادم ماكايحتارمش القانون و فأول محاولة كاديرها الدولة لفرض احترام القانون كانوضو كانبكيو ! لا بزاف خمساوعشرين درهم .

لا ماشي بزاف خمساوعشرين درهم ! ماشي بزاف لاكانت غاتعلمك درس ماقادرش تعلمو بوحدك هادي سنين و منين ! ماشي بزاف لاكنا من هنا خمس سنين و لا عشر سنين غايولي عندنا بنادم كايحتارم ممر الراجلين.

ماشي بزاف خمساوعشرين درهم فسبيل أننا نتحضرو شوية !

و بالنسبة لهادوك لي كايقولو ” الدولة كان عليها توعي الناس” شوف آ الحنين، لاكاتهضر ليا على الوعي أنا غانقوليك بلي مازال خاصنا شي ميات عام اخرى باش بنادم يوعي بلي خاصو يقطع من ممر الراجلين و لاكان سايگ‌ مايحرگش الضو الحمر و بلي الميكة راها كاتلوث الطبيعة و كاتشكل خطر كبير عبى البيئة ! مازال قدامنا ميات عام على الأقل باش بنادم يوعى بهادشي ! ايوا من هنا ميات عام شنو نديرو ؟ نجمعو يدينا و نخليو هايشر يدير مابغا ؟ يمارس السلوكات اللاحضارية ديالو على خاطرو ؟ مايمكنش ! ضروري من المنع و القوانين الجزرية و المخالفات و الغرامات باش يا الله بنادم يتگاد شي شوية ! خروب بلادي وانا عارفاه واش غانكذبو على بعضياتنا و نطيحو الباطل على المخزن ؟

ياك غير الميكة هي اللخرة من نهار عقلت و الحملات التحسيسية خدامة ! عافاكم ماتستعملوش الميكة ! الله يرحم الواليدين لاما فكرو تبدلو الميكة !الله يشد ليكم فالصحيحة لامانقصو الميكة راها مضرة بالبيئة ! شفنا حملات و برامج فالتلفزة و فين تسوق ليهم شي حد ؟ واش حنا كايگرو فينا الحملات التحسيسية ! وواخا هكاك تاحاجة ماتبدلات و عام على عام المغربي كان كايستهلك الميكة اكثر.

للأسف مايمكنش نساينو “الوعي” باش نقضيو على السلوك اللاحضاري عند بزاف ديال الناس ! ايه بعرور لاضربتيه لجيبو عاد كايفيق ! عا غادي وكايشتف منين مالقا كايقطع ! لاحبسو البوليسي و خلص عليها المرة الأولى خمسميادريال و المرة الثانية خمسميادريال ! المرة الثالتة غايجمع راسو و غايقلب على ممر الراجلين لي غايقطع منو.
هادا ماكان و بلا قوة التفلسيف الخاوي.

موضوعات أخرى

28/03/2024 14:00

وزير النقل للساقطين فامتحان البيرمي: غانعطيوهم فرصة جديدة ومغاديش يتحسب امتحان الاثنين والهدف من الأسئلة الجديدة هو نقصو من الكسايد

28/03/2024 13:00

“الهاكا” مسؤولة على فضيحة “مومو” مع “هيت راديو”. كيفاش تعطلات تخرج قرار فاكثر منشط عاقباتو

28/03/2024 12:30

من هنا لسيمانة.. اللي عندو شي طوموبيل أو موطور ففوريانات كازا ومجاش سحبهم غيتباعو

28/03/2024 12:20

جنايات فاس فرقات 33 عام ديال الحبس على ريزو د التهجير السري وها التهم اللي تابعوا بها

28/03/2024 12:19

ليلة “العشاء الأخير” فحزب الاستقلال: هادي 3 قضايا كبرى غادية تشعل حروب ف “الميزان” قبل وبعد المؤتمر

28/03/2024 12:10

جوندارم الدروة طيحو  بزناز عندو الحشيش والبوفا والغبرة والقرقوبي نواحي برشيد