اجرى الحوار هناء ابو علي كازا ////

كيفاش كيتخلق مشروع كبير. كيفاش كتجي افكار مشروع اوريجينال. اش المحفزات ديال البيزنيس وومان والبيزنس مان فمشاريع جديدة مبتكرة. هاد الاسئلة وغيرها سولناها ف”كود” لسلوى الادريسي اخنوش اللي طلقات “يان اند وان”. مشروع كبير تحول فايام قليلة لاشبه بحفل للموضة للجمال. فيه المغربيات. كلشي المغربيات. حوار تكلمات فيه صاحبة المشروع بقلبها

طلبات منها “كود” تعطينا 5 اسباب حفزاتها على مشروع جديد بعد تجارب كثيرة من تجيب “زارا” وغيرها الى المول الكازاوي “موروكو مول”. سلوى الادريسي احدى اشهر سيدات الاعمال دابا فالمغرب وفالعرب قدمات هاد المحفزات بلا زواق.

السبب الاول كما قدمته ل”كود”
استقرار البلاد وثقتي فيها والملك ملهمي

اختاريت نستثمر وندخل لهاد المشروع اللي مختالف عن باقي مشاريعي حقاش بلادي مستقرة. عندنا فيها كمغاربة دعم ملكي. ملك شاب ديناميكي هو الملهم الاول لي فهاد المشروع وغيرو. كيورينا الطريق. كنعتابر راسي بنت الملك بحال جميع المغاربة. حنا اولادو. هو قدوة لينا. قدوة كتخلينا ندخلو للمغامرة. انا “غامرت” بالاستثمار ف”يان اند وان” فبلاد مستقرة. المؤشرات فيها كلها خضرا. صدقوني. خاصنا نغامرو فبلادنا بمشاريع بابداعات. كل واحد فميدانو.
حشومة وعيب وعار رجل اعمال او سيدة اعمال ما يكونش عندها حس المغامرة فمغربنا.

السبب الثاني:
بغيت شباب بلادي يخدم ويفرح فمشاريع بحال هادي

المحفز الثاني لمشروعي “يان اند وان” هو الشباب. ما كنفهمش كيفاش شبابنا او اولاد بلادي يقلبو على شي حاجة ديالنا فالخارج. طبعا كسيدة اعمال كيهمني نخلي الخير ببلاد كنعشقها. عطاتني بزاف. كان ممكن ندير بيزنس اخر. بيزنس كيقولو عليه “مضمون” والريسك فيه ما كاينش. كان ممكن ندير مشاريع بحال اللي دارو والدي وجدودي. حقاش الشباب محفز لي بغيت نخلي قيمة مضافة. بغيت شباب بلادي يفرجو بمشاريع بحال هاد المشروع. يستافذو منو. اللي كيخدم معانا فالمشاريع اللي درتها من 2004 كلهم شباب. اليوم كل واحد عندو عائلة. ما تصورش فرحتي فهاد الامر. كنقول عندنا ملك شاب وانا شابة هاد الوطن خاصنا نعاونو الشباب نخليوه يثيق فبلادو فراسو. عندنا مشاكل فتشغيل الشباب واخا الدولة موفرة لينا فضاء للاستثمار اللي خاص هو نساء ورجال اعمال يبدعو يخلقو فرص شغل. هادا واحد من الاسباب اللي حفزاتني على هاد المشروع. بدينا ب200 شابة وشاب مغاربة مع 30 من الخبراء المتخصصين من اوربا ف”يان اند وان” ودابا زدنا 20 شاب اخر،

السبب الثالث
بغيت نخلي شي حاجة لبلادي
انا فهاد الميدان ديال الخدمات والتجارة ولفرانشيز ومن بعد المول من سنوات. جبنا الماركات العالمية. ثاقو فينا. ولكن بعد هاد الشي كولو كنسول اش ردت لبلادي. شي بصمة ديالي ديال المغرب. اييه دابا الدار البيضاء ولات نافذة عالمية. مع هاد التجارب٬ كيف قلت ليكم “كود”٬ كنقول شخصيا اش درت. قلبت على شي حاجة تخرجنا للعالمية. علاش هما دارو ووصلو العالمية ولاو سفراء لبلادهم فالموضة ففن العيش وحنا اللا؟ حقاش كنأمن ببلادي كنأمن بالتحولات الايجابية فيها ومع الثقة والمعقول والارادة توكلت على الله وربي ما خيبنيش.

ما عنديش “المستحيل” فقاموسي. 3 سنين دالعمل. احسن لابوراطوارات واحسن الخبراء مع المواكبة والمتابعة عطاتنا هاد الشي اللي كتشوفو فيه. كلشي هاد المنتجات ديال “يان اند وان” دارت فيها خدمة كبيرة.

دابا بدينا ولقينا ان ADN ديالنا هو هاد المجانية. يجيو بنات وولاد يجربو ومعاهم خبراء ماكياج فابور امور كثيرة فابور. بلادنا بلاد الكرم والضيافة. فدار كل مغربي كيعطي احسن ما عندو. هنا بغيت هاد المشروع يكون صورة لهاد المغرب العزيز على قلب كل مغربي.

السبب الرابع
بغيت لبنات بلادي اللي بغيتو لراسي وقلبت علي ليكسيلونس
هاد المشروع كولو باش لمغاربة يثيقو فالمنتوج المغربي يحسو بيه. التجاوب اللي وقع من نهار تفتح كيخلي الانسان يكون عندو طموح اكثر ولكن مع مسؤولية اكبر. هنا كنديرو الاحسن. هادي فيترينة للمغرب. واجهة لحضارتو. وجه من اوجه جمالو. بغيت كل مغربي مغربية يثيقو فبلادهم يثيقو فمغربهم يثيقو فريوسهم.

اعتبرت المشروع فالاول دين فعنقي علي بلادي. 3 سنين من التفكير. جربت لي كريم وبقينا كنقادو فيهم باش يوصلو لهاد الشي اللي معروض اليوم. درت للمغاربة داك الشي اللي كنبغيه لراسي. خدمت بكل اتقان. كل منتوج منتوج ديال “يان اند وان” صايبتو لراسي. ما يمكنش نعطي للمغاربة شي منتوج انت ما كديروش. عطيهم اللي كتبغيه غاديين يتفاعلو معاك. فهاد المشروع قلبت على ليكسيلونس. كنبغي الاتقان والجودة. بلا هاد الشي ما يمكنش ندخل لشي مشروع. حتى الثمن تم التفكير فيه. فكرنا فالبيع اكثر بثمن اقل. هامش صغير للربح وجودة عالية وثمن فمتناول المغربي

السبب الخامس
ما كنأمنش بالمستحيل والمغرب بلاد مبروكة وكنثيق فاصولي

بغيت لمغاربة يثيقو فراسهم. يعرفو باللي المستحيل ما خاصوش يكون فقاموسهم. بلادنا عندها تاريخ عندها ماضي مجيد عندها حاضر رائع. عطات نجوم وخرجات ناس متميزين حقاش ثاقو فريوسهم. ما عمرهم امنوا بعبارة: هاد الشي ما يصلاحش لينا.
كنثيق فالمغرب. كنثيق فجدودي. كنثيق فاصولي. كنثيق فملكي. كنثيق باللي بلادنا فيها البركة. بلاد مبروكة.
هاد البركة بانت فالافتتاح الرسمي ل”يان اند وان” السبت اللي فات كان مفاجأة سارة بزاف لي. استغربت لمشاعر المغاربة اللي حضرو. سبق لي حضرت لبزافت الافتتاحات لمشاريعي ولكن هادا كان مختلف. ما عمرني حليت بالزعاريت. داك الشي بكاني. اثر في بزاف. زاد المسؤولية علي.