الرئيسية > آراء > انا فاش كانسمع القصة ديال القاصرة نادية المراكشية كانتسائل فيناهوا بّاها ؟ لي مسؤول انه يصرف عليها و يقرّيها باش ماتحتاجش تعري مساسطها فاليوتوب باش تخلص الكرا حيت كاتسمع حنا دولة اسلامية و مجتمع ذكوري و أنا راجل و مانبغيش المرا خدامة و مانبغيش بنتي تقرا كايصحابك گاع الرجال قادّين بشغلهم فاللخر كانلقاو عيالاتهم و بناتهم معريين مساسطهم فاليوتوب
26/06/2022 18:00 آراء

انا فاش كانسمع القصة ديال القاصرة نادية المراكشية كانتسائل فيناهوا بّاها ؟ لي مسؤول انه يصرف عليها و يقرّيها باش ماتحتاجش تعري مساسطها فاليوتوب باش تخلص الكرا حيت كاتسمع حنا دولة اسلامية و مجتمع ذكوري و أنا راجل و مانبغيش المرا خدامة و مانبغيش بنتي تقرا كايصحابك گاع الرجال قادّين بشغلهم فاللخر كانلقاو عيالاتهم و بناتهم معريين مساسطهم فاليوتوب

انا فاش كانسمع القصة ديال القاصرة نادية المراكشية كانتسائل فيناهوا بّاها ؟ لي مسؤول انه يصرف عليها و يقرّيها باش ماتحتاجش تعري مساسطها فاليوتوب باش تخلص الكرا حيت كاتسمع حنا دولة اسلامية و مجتمع ذكوري و أنا راجل و مانبغيش المرا خدامة و مانبغيش بنتي تقرا كايصحابك گاع الرجال قادّين بشغلهم فاللخر كانلقاو عيالاتهم و بناتهم معريين مساسطهم فاليوتوب

سهام البارودي – كود//

مؤلم و مؤسف بزاف المنظر ديال قاصرة كاتعري ترمتها فاليوتوب و كاتصور ڤيديوات فاضحة باش تخلص الكرا و تاكل و تشرب هي و مها و ختها !عوض انها تكون فالمدرسة كاتدوز الامتحان الجهوي و كاتفكر فالعطلة د الصيف. و مقزز المنظر ديال مت نادية المراكشية و هي كاتدفع بنتها باش تتعرى و عوض انها تحميها و تحمي مستقبلها هازة يديها عليها و مخلياها كاتعرى و كاتعرض للسبان و التحرش و الاستغلال و هي فداك السن الصغير.

القصة ديال نادية المراكشية راها غير قصة من بزاف، ماشي الأولى او الاخيرة لي غاتدفعها مها انها تقحب او تقودها باش تاكل و تشرب من شحال هادي و هاد الظاهرة كاينة عند العائلات المزلوطة لي ماعندها نفس حيت كاين لي مزلوط و لكن بنفسو و كرامتو و كاينين قحاب گاع كادير كلشي ولكن ولادها و بناتها خط احمر بغاتهم يقراو و بغاتهم يخدمو على راسهم و كاتقاتل باش تبعدهم على عالم الدعارة و الليل ! و كاين في الجهة الاخرى امهات و آباء ماعندهمش الكبدة على ولادهم كايستاغلوهم ابشع استغلال و ماعندهمش مشكل بنتهم تقحب باش ياكلو و يشربو و بزاف د الاسر عايشين بهاد الطريقة كايقوليك بنتي الله يرضي عليها خدامة فالامارات ! آش خدامة فالايمارات ؟ مديرة ديال السوفيتيل ! على زين القراية لي قريتيها و على الديبلومات لي خلصتي عليها و السوايع لي ديتيها ليهم و اللغات لي قريتهم ليها ! بنتك كاتقحب آ الشريف و نتا كاتاكل و تشرب من عرق الطبون ديالها.

لي كايفقصني انا هوا تشراگ الفم لي فشي رجال فالمغرب ! لاسمعتيه كايهضر و كايخرج عينيه تقول هنا نبات ! حنا دولة اسلامية ! حنا مجتمع ذكوري ! انا راااااجل! انا مانبغيش مراتي تخدم! مانبغيش مراتي تقرا ! انا راجل ! الشرع عطانا ربعة ! انا راجل ! راجل ! راجل! تقول هنا نبات ! صافي هذا هوا الراجل ايه متزمت و متخلف و رجعي و لكن اوموان قاد بشغلو ! ساعة فاللخر كانلقاو بنتو كاتقحب فالامارات و لا مرتو خارجة معرية مساسطها فاليوتوب باش دخل ليه فلوس الادسنس ياكل بيهم و يشري بيهم كازا ! شحال من راجل دابا بموسطاشو يكتف شفار تايجلس تاهوا يتقهوى مع الرجال و يتبعصص و يخرج فعينيه و ديك القهوة مخلصة بعرق الطبون د بنتو !

فيناهوا الأب ديال نادية المراكشية لي مسؤول انه يصرف عليها و يقريها و يكري ليها و يكسيها ؟ فيناهوا الراجل المغربي المسلم لي كايعرف غير الشرع عطانا ربعة و المرا عود و الراجل جوج عواد ! فيناهوا ؟ و هاد البنات لي مطلوقين كايمارسو الدعارة داخل و خارج المغرب عبر اليوتوب و عبر البراتش و عبر السكايب و عبر الشقق المفروشة فيناهوا الأب و الاخ و الزوج و العم ديالهم ؟

دابا خاصنا نكونو واضحين مع راسنا واش حنا مجتمع مسلم ذكوري الراجل فيه عندو قيمة اكبر من المرا و هوا رب البيت و هوا القوام و هوا لي كايصرف و لا حنا مجتمع ديال المساواة و فهاد الحالة راه خاص العيالات ياخدو حقهم فالورث بالمناصفة مع الراجل و يقراو و يخدمو و اي واحد كايجوج شي قاصرة يدخل دينمو للحبس و اي واحد كاينمنع بنتو من السكويلة يدخل تاهوا للدين ديماه للحبس ! حيت مايمكنش نبقاو عايشين فهاد المجتمع الهجين لي الراجل بغا المرا تسمع ليه و يحكم فيها و تقطع علاقتها بصحاباتها و ماتخدمش و تمشي تغسل لمو الكرشة فالعيد الكبير و تخوي المصارن من البرّيو و لكن بالمقابل هوا يعطيها للنعاس و الحزاق و الحوا مايصرف مايكسي مايسكن مايتحمل مسؤولية !

ما حنا عايشين فحال السواعدة
ماحنا عايشين فحال الاوروبيين

حنا ختارعنا مجتمع جديد يقوم الاقتصاد ديالو على نشر الگراصن ديال عيالات الرجال فاليوتوب ! و انتظار الادسنس باش الراجل يمشي كايجري يتقهوى و يشري جوج فورتينا !

موضوعات أخرى

15/08/2022 09:00

الدولة كتعطي للصحافة الدعم ولخبار لصحابهم ف”جون افريك”. كيفاش سربو ليهم التعديل الحكومي وبالاسم وقبل خبار مرض ام الملك. هاداك الدعم زيدوه فيكم ايلى كنتو ما تايقين فصحفكم

15/08/2022 08:00

“كود” قالت ليكم مافيدوش. وفينك يا بوريطة يا مول لمقص. علاش باش فرانسا كتهين لمغاربة سرطي لسانك وباش كولومبيا عتارفات بالبوليساريو ضربتي الطم

15/08/2022 07:00

تقرير للباروميتر العربي بجامعة “برينستون” الأمريكية : 34 ف المائة من المغاربة باغيين يخويو البلاد والأغلبية لأسباب اقتصادية