كود ياوندي ///
فماتش المغرب ضد غانا بياوندي هادي يومين عن اولى ماتشات المجموعة الثالثة من كان الكاميرون٬ كان جمهور كيشجع المنتخب. شجعو مزيان. غير هما ماشي مغاربة. فيهم شي عدد قليل بزاف من لمغاربة.
هادو حسب ما جمعات “كود” من معطيات، من مملكة بامون. مملكة عندها ارتباط مع المملكة المغربية من العهد الموحدي. اييه يا سيدي دولة ضاربة فالتاريخ.
فالمدرجات كان امير حتى هو كيشجع اسمو جمال عبد الناصر. متزوج من مغربية وهو حفيد ملوك هاد المملكة. جا وجاب معاه مواطنو المملكة باش يشجعو دولة حافظات على علاقتها بالمغرب.
هاد المملكة راها ديما كتقدم البيعة لملوك المغرب. كيقدموها كل عام دابا لسيدنا. حتى مملكتهم حسب احد زوارها ل”كود”٬ فيها التراث المغربي فالهندسة فالمعمار. مملكة قوية. سايدو ولد الملك اللي مات كان ترشح للجامعة الكاميرونية لكرة القدم ضد اللاعب المعروف صاومويل ايطو. فاللخر داها النجم الكاميروني.
دابا فماتشات المغرب غادي يكون هاد الحضور الاميري. كيشجعو لبلاد بصدق. ما وقفوش واخا بغى يركب على هاد الشي هاداك الظلمي. الساعة ما عقلوش عليه.
