كود هناء ابو علي ///

المغرب اليوم لاعب ماتش تاريخي. غادي يكون اول دولة فافريقيا تعطي انطلاقة عملية تلقيح غير مسبوقة ضد كورونا ڤيروس. اللي غادي يعطي السونتر هو رئيس الدولة. البارح فبيان من الديوان الملكي قال باللي محمد السادس غادي يعطي “الانطلاقة الفعلية للحملة الوطنية للتلقيح يوم الخميس =يعني اليوم=.

هذا تحدي كبير. المغرب لعب مع الدول الاكثر غنى. قدر يجيب لقاحات واخا كاينة منافسة كبيرة بزاف بزاف. دول دارت المضاربات غلات اللقاحات. خلصات كاش. وعندها حضور دولي كبير. حنا لعبنا مع هادو ونجحنا. سبقنا قوى اقليمية وقارية كبيرة. درناه قبل من جنوب افريقيا. وصلاتنا شحنة “استرازنيكا اوكسفورد” بحالنا بحال البرازيل.

ما عرفتش واش لمغاربة عندهم وعي اش كيعني هاد الشي. كيفاش خاصك تفاوض وانت دولة بامكانيات محدودة واوراق قليلة فيدك. راه حدث كبير بزاف بزاف.

هاد المرحلة ربحناها. دابا اجيو نشوفو المرحلة الثانية فالمعركة داللقاح وهي التطبيق الفعلي ليه. الداخلية قالت باللي لوجيستيك واجد. الصحة وضحات باللي قاعدة البيانات ومتابعة كل دوز من هاد اللقاح حتى توصل للحقن٬ واجدة. الجيش مستعد يوصل الڤاكسان للبلايص لبعاد. الامن موجد حماية هاد الحقن.

نظريا كلشي جاهز. غير هادي بلادنا وعلماتنا التجارب انو فالوقت اللي كنكونو غاديين مزيان كنقودوها بشي تصرفات. واش هاد المرة غادية تكون استثناء؟ اتمنى.

المشكلة من دابا كتبان فقطاع الصحة. ما جاهزش لعملية بحال هادي. عندنا لعاب ضعيف فهاد الماتش اللي هو وزير الصحة خالد ايت الطالب. بان ضعيف من نهار وصل للوزارة. دار قرارات غبية. دازت صفقات راه كاينة لجنة برلمانية كتحقق فيها. دخل فصراعات. فشل فالتواصل. واحد بهاد الماضي اللي ماشي زوين٬ ما يمكنش تنتظر منو حملة لقاح ناجحة مائة فالمائة. التخوف هو ان شي فئات مستهدفة ما يوصلهاش. خاصة الناس لكبار. التخوف هو اطر فالقطاع يديرو زباين تضرب هاد الحماسة.

نحاج عملية اللقاح خاص كلشي يساهم فيه وخاص كلشي يكون لاعب بنفس النيڤو. مع حماسة قبل الماتش ننساو كلشي ونقولو غاديين نربحو. خاصنا نربحو. حقاش وجدنا كلشي باش نجحو. اتمنى التكهنات بخصوص كلها على وزارة الصحة تبقى تكهنات. نديرو كيف كل مرة كنتفرجو فالاسود. ديما كاين احساس باللي رابحين