19/04/2024 16:00
ملف الطبيب التازي : مرافعة الوكيل العام تقول ان جناية الاتجار بالبشر كينا
سهام البارودي – كود//
فضل اليوتوب كبير على بزاف ديال الناس لي دارو بيه الفلوس و تشهرو و صوڤاو راسهم و عائلاتهم و الامثلة فالمغرب عديدة : مي نعيمة، اسماء بيوتي، مربوحة ولدها، ولد الشرقي، الشاخدة… و بزاف ديال الناس كانو غايبقاو غارقين فالفقر المدقع كون ماكانش يوتوب ! اغلب القنوات كاتسترزق بحياتها، بفقرها ، بسذاجتها و كاتلقاها كاتلبي واحد الحاجة عند المتابع المغربي للتبرگيگ! حيت حنا شعب كايموت على التبرگيگ ! اغلب المتابعين لأسماء بيوتي مثلا ماكانوش كايتبعوها حيت كاتقدم وصفات ديال البيوتي لي مابيوتي ما تاخصية لا ! كايتبعوها باش يشوفو الحياة ديال كوافورة و راجلها فدار فالسكن الاقتصادي و يشبعو ديك الحاجة للتبرگيگ le voyeurisme! و المتابعين لمي نعيمة ماشي وصفات الطبخ ديالها لي كايهموهم ولي اصلا ماطبخ ماتاخصية حيت مي نعيمة ماشي هي الشاف بول بوكيز بقدر ماكايهمهم يشوفو حياة ديك المرا القروية البسيطة لي كاتمثلها ليهم و عليهم حيت مي نعيمة فالواقع راه قافزة و مطورة و عارفة داك الترهبين و التمسكين ووليداتي و بنياتي هوا لي كايوكلها الخبز اما هي المشاهدين راه ماعمرها شافتهم باش تبغيهم هي كاتبغي الفلوس لي كايدخلو ليها!
ولكن وسط هاد الجوطية اليوتوبية كاينة الظاهرة الجديدة ديال نزار السبيتي أو كيفاش المرض النفسي يقدر يكون سبب رزق ! انسان وصل للطوندونس ماشي حيت كايقدم شي محتوى و لا شي حاجة مضبوطة! انسان وصل للطوندونس حيت “هبيل” ولكن لاحقققتي فيه مزيان غايجيك الدري شبعان مشاكل نفسية و خاصو يكون متبع عند شي بسيكولوگ ضروري ضروري حيت الدري ماشي عادي !
هاد القضية ديال واش نزار السبيتي عادي و لالا ؟ راه الجواب ديالها باين لأي واحد بعقلو ! ولكن واليديه لي واليديه فاش كاتسمعهم كايهضرو عليه كايهضرو عليه على اساس انه انسان عادي و كايوصفوه بشي اوصاف فحال ” نية” “ماكايعرفش” ” فحال شي دري صغير ” واااالاااا يا عباد الله ! علاش كاتنكرو انه ولدكم خاصو الطبيب ؟! ايه عارفين بلي المغاربة ماكايرضاوش بالمرض النفسي و لكن هاد عائلة نزار راه ماعارفينوش اصلا مريض ! مو كاتقوليك ” ولدي ماشي حمق ! واش كاين شي احمق كايهضر و كايلبس و كاي…” حيت كايصحابها الحمق هوا هاداك لي كايلوح حوايجو فالزنقة مافراسهاش بلي “الحماق ” انواع و بلي “العته” درجة من درجات الحماق ! “ولدي ربيتو مزيان راه تا لاكارط گيشي ماكايعرف يخدمها و كان يحشم يجبد موضوع الجواج” كاتوصفو بهاد الطريقة و فرحانة و فخورة مافراسهاش بلي هادشي لي كاتقول على ولدها راه من علامات التأخر العقلي ! حيت ماشي طبيعي انه دري عندو خمساوعشرين عام ماكايعرفش يتعامل بالفلوس و ماكايعرفش الخايب و الزوين و ماكايفهمش الضحك و المعقول ! و ماشي طبيعي انه علاقتو بالمرا (ندى) تكون علاقة مرضية فيها العصا و التجنديخ و التكلبين الا اذا كانت علاقتو بالأم ديالو اصلا علاقة عوجة ! غير سوية ! اثرات عليه !
و هاكا نزار صنع من راسو “انيمال دوفوار” بلا مايعرف و وولا بطل من ابطال السيرك اليوتوبي كايدر مداخيل بالملايين لمراتو ندى حاسي لي طبعا عارفة قانون السوق و عارفة علاش مخلياه حداها.
