سهام البارودي – كود//

مؤخرا انتشر مقطع بعض الاسرائيليين من أصول مغربية خرجو فالشوارع تما هازين الرايات و كايغنيو أغنية المسيرة الخضرا و فرحانين ! كايعبرو على المساندة ديالهم للمغرب فالصراع ديال الصحرا !

ماعمرك غادي تلقا شي خوامجي و لا شي سلفي مبارطاجي فحال هاد الفيديوات ! داك الحقد الدفين لي فيهم و الكراهية ديالهم لليهود غايمنعوهم ! ماكرهوش هوما كون ماكانوش هاد اليهود المغاربة گاع اصلا و كون گاع المغاربة كانو مسلمين ! مسألة انه المغرب ارض لليهود مسألة كاديرونجي بزاف هاد الخوت و ماكرهوش يمسحوها من التاريخ ! و حتى فاش الملك خرج بتوصيات انه الثرات اليهودي يتدرس فالمناهج التعليمية ! بزاف ديال صحاب “قال الله قال الرسول” دارو راسهم ماشافوش الخبر و لي شافو فيهم فحال الكتاني خرج بتدوينة كايقول فيها ” ما هذا الخبر المزعج؟”

ياك آ حنيني ؟ ياك آ بولحية ؟! تدريس الثرات اليهودي لي جزء من التاريخ المغربي ولا خبر مزعج ؟! ايوا سمح لينا حيت فيقناك من لاسييست و ديرونجيناك ! نوض نوض سوطنا نتا گاع! هز شي زلاط و لي بان ليك فالزنقة سولو واش باغي تدريس الثرات اليهودي فحال لي قال سيدنا و لي قاليك ايه موافق نزل عليه للظهر بداك الزلاط ! و لا عرفتي آش غايجيك مليح بدل لينا نتا الدستور گاع ! هاك گومة و حيد منو ديك الجملة ديال “المملكة المغربية كدا و كدا …..والغنية بروافدها الإفريقية والأندلسية والعبرية والمتوسطية”! مسح ديك كلمة ” العبرية ” لي مديرونجياك ! ملي ماباغيش الدراري يقراو على الثرات اليهودي !

والايني ماكايحشموش هاد الناس !  شوفو قصوحية الوجه كي دايرة عند هاد الاقصائين ! باغين غي بوحدهم لي يكونو مغاربة ! و ماكرهوش يبدلو التاريخ د المغرب باش يمسحو منو جميع المكونات و يخليو غا العربية و الاسلام فقط! الامازيغية كاديرونجيهم و اليهودية كاديرونجيهم و أي حاجة ماكاتشبهش ليهم كاديرونجيهم ! باغين المغرب يكون ديالهم بوحدهم و يديرو فيه شرع يديهم ! يطمسو لمو التاريخ ديالو ! و يغبرو گاع الاختلافات و الثقافات لي كايساهمو فتشكيل الهوية المغربية !

ايوا تما بقيتي آ الكتيتيني نتا و خوتك ! المغرب ماعمرو غايكون كيما كاتخايلو و ماعمرنا غانلبسو الجلالب و الزيوف و نحبسو الغنا ديال العيوط و الموسيقى فالعراسات و نسدو الملاهي و لوطيلات و الريسطورات باش تبقا لينا نتا على خاطرك ! و غايبقا المغرب أرض الأمازيغ الغنية بالثرات الاسلامي و اليهودي و الاندلسي و الافريقي … و غايبقا ارض اليهود و عندهم فيها حق!

وانا شخصيا بالنسبة ليا اليهودي المغربي لي كايهز الراية د البلاد و كايدافع على الصحرا و كايغني الشعبي و حافظ اغنية العار يا العار و كايعجبو الكسكسو ! راه احسن ليا من اي مسلم فحالي و لكن من عباد اردوغان، كاره للموسيقى و كايفضل يهز راية فلسطين على راية البلاد ! و احسن الف مرة من اي بولحية كاره للفن و الحرية ! و لي ماراضيش باليهود المغاربة و بالمساهمة ديالهم فالتاريخ د هاد البلاد يقود منها و يشوف ليه شي بلاد فيها غا اللحايا فحالو !