كود الداخلة //

صرعات وتجاذبات كبيرة كتعرفها الوكالة الحضرية بالداخلة بين جوج تيارات نقابية، ومكاين غير شدلي نقطع ليك، ومصالح المواطنين مشات فالرجلين فالوقت اللي هاذ الإدارة بلا مدير .

مصدر خاص ل”كود”، شبه الوضع فالوكالة بالوضع اللي فسودان (مجموعة ديال حميتي ومجموعة ديال برهان) كلها يلغي بلغاه ومعركة طاحنة بيناتهم خلات الوكالة مشلولة بلا دور بلا فائدة وكأنها مكتب ديال أشخاص دايرين شرع أيدهم .

جمعية محلية ديال المال العام طالبات بفتح تحقيق في ثروات بعد موظفي الوكالة مؤكدة أن نتائج هذ التحقيق إلى دار ..غادي تبين كلشي وغادي يتعرف سبب هذ الصراعات بين جوج تيارات كلها باغي يحكم ويدير اللي بغا بلاحسيب ولا رقيب .

اليوم فالصباح دار إجتماع جمع المتضررين من وضعية الوكالة الحضرية بالداخلة وابتزاز بعض الموضفين والتماطل والتسويف ديالهم وطالبو عبد اللطيف النحلي الكاتب العام لقطاع إعداد التراب الوطني والتعمير واللي كيعرف الداخلة مزيان ، بتطهير الوكالة من موظفين عشعشو أكثر من عقدين من الزمن وخاصهم يمشو فحالهم مؤكدين ” صافي باركة خاص دماء جديدة تواكب نظرة ديال سيدنا للداخلة كمدينة عالمية وقوة اقتصادية لا يستهان بها.

يذكر أن الوزيرة المنصوري في اخر مجلس اداري للوكالة بالداخلة شددت على أن مواكبة الأوراش التنموية الشاملة التي تشهدها الداخلة تفرض إنخراط الجميع وتعبئة كل الطاقات، مؤكدة في هذا الصدد أن الوكالة الحضرية للداخلة – وادي الذهب مطالبة بالعمل إلى جانب المنظومة المحلية، بالنظر للمهام المنوطة بها في مجالي التخطيط والتهيئة، مع إستحضار مصلحة الوطن وماشي مصلحة الموظفين .

هذا ويشار إلى أن وزارة الداخلية ووزارة الإسكان والتعمير وسياسة المدينة، في دورية المشتركة، شددو على الوكالات الحضرية عدم إلزام المواطنين بوثائق إدارية غير ضرورية، مع تكثيف جهود وآليات المساعدة لفائدة الساكنة، كما أكدتا على ضرورة التعامل مع طلبات المواطنين بالمرونة اللازمة، وإعطاء كافة التسهيلات الضرورية .