محمود الركيبي -كود- العيون //

حل وفد رفيع من رجال الأعمال والمستثمرين الإسبان اليوم الخميس، بمقر جهة كلميم وادنون والمركز الجهوي للإستثمار باش ايشوفوا فرص الإستثمار لي كاينة فالمنطقة.

وحسب المعطيات لي توفرات عليها “كود”، فالوفد الإسباني اتافق مع مسؤولي جهة كلميم وعلى رأسهم امباركة بوعيدة، باش يستثمروا فالمنطقة فعدد من المجالات ولي أهمها بناء وحدات صناعية ومصحات طبية.

بوعيدة قدمات تسهيلات كبيرة للوفد الإسباني، لي علن على رغبتو فالإستثمار بجهة كلميم بعدما دار جولة فعدد من الأوراش الصناعية، واكتاشف المؤهلات الإقتصادية لي كتزخر بها منطقة وادنون خصوصا الفلاحية والسياحية و البحرية.

بوعيدة وفتصريح ل”كود”، فقد أكدت بلي زيارة الوفد الإسباني فهي مهمة، وقدمنا ليهم عروض فعدد من المجالات لي يقدرو يستثمروا فيها، وهادشي كتزيد بوعيدة بأن الاستثمار الأجنبي فصالح منطقة وادنون بصفة عامة، وغادي يكون عندو تأثير إيجابي كبير على الساكنة والشباب.

بوعيدة مادوزاتش الفرصة فكلامها بش تثمن من جديد الدعم الحكومي الإسباني للمغربية الصحراء، والموقف الإيجابي لي علناتو حكومة بيدرو سانشيز من خلال تأييدها لمبادرة الحكم الذاتي فالصحرا ولي كيعبر على السيادة المغربية على الاقاليم الجنوبية، وهو الأمر لي قالوا الملك محمد السادس فخطابو الأخير حيث رحب بالدول لي عندها مواقف واضحة من قضية الصحرا بحال الصبليون.