بلوكاج اللجنة التنفيذية فمؤتمر الاستقلال.. لائحة مهددة بالرفض غاتحط لأعضاء المجلس الوطني
كود هناء ابو علي ///
اليوم فالصباح “مومو” خدام ف”هيت راديو”. منشط برنامج اذاعي فالصباح كي العادة بحال ايلى حتى حاجة ما واقعة. الفضيحة اللي كشفات عليها “كود” وبعد 24 ساعة خرج بيان من الادارة العامة للامن الوطني٬ وول البارح لثلاث 26 مارس 2024 وجهات النيابة العامة لدى الابتدائية عين السبع فكازا، تهم لهاد المنشط “مومو” ففضيحة شفرة بورطابل دارها مع جوج ودوزها فالاذاعة. ودابا عندو تهم: “اختلاق جريمة وهمية” و”نشر خبر زائف يمس بالإحساس بالأمن لدى المواطنين بواسطة الأنظمة المعلوماتية” و”إهانة هيئة منظمة عبر الإدلاء ببيانات زائفة”.
مومو خرج من الحبس بكفالة 10 مليون وتابع فحالة سراح فيما توبع دوك الجوج فحالة اعتقال.
تصورو كلشي هاد الشي و”مومو” مازال كيدوز. مازال كينشط برنامجو اليومي. هاد الصباح هاد المنشط الاكثر تعرض للعقوبات عند “الهاكا”٬ كيهدر على رمضان. بغظ النظر على النقاش المتخلف وترويجو بافكار محافظة تجاوزها الوقت٬ ولكن كيفاش اذاعة كتسمح لمنشط دار هاد لفضيحة الاخلاقية المهنية المخالفة للقانون يبقى ف”لانتين”.
الاذاعة باصرارها على استمراريتو كترتاكب فضيحة اخرى اخلاقية ولكن المسؤولية الاولى كتحملها “الهاكا”٬ الهيئة العليا للاتصال السمعي البصري كتفرج. علاش تعطلات باش تخرج قرار بسرعة فهاد النازلة. طبق القانون اللي عندها. اما المحاكمة فهاك شأن القضاء.
الهاكا فقضية اضرابات رجال التعليم وباش جمال براوي فاذاعة “ام اف ام” تحركات بسرعة. دارتها باش تبرد الطرح. مع مومو” اللي كليان عندها٬ ما قدراتش تخرج قرار بسرعة. الهاكا اليوم كتعطيه شرعية يبقى فلانتيت. هادي فضيحة ليها.