عفراء علوي محمدي- كود//

الممثلة فاطمة الزهراء لهويتر ردات على مصدر من فريق عمل فيلم “القلب الغارق”، اللي كان قال عبر “كود” بللي هذ الممثلة مابغاتش تكمل التورناج ديال الفيلم حتى تاخد فلوسها، واخا كانت بقات على النهاية ديالو ثلاث أيام و”دارت العصا فالرويضة”، وهذشي علاش مخرج الفيلم، فريد لحكيمي، باقي ما خلثهاش فالخدمة اللي دارت، وحيدليها دور البطولة من الفيلم وحيد اسمها من لافيش.

الممثلة المغربية أكدات، فتدوينة ليها على موقع التواصل الاجتماعي “فيسبوك”، بللي هذشي ماكاينش، وردات على قولو بأنها حبسات التصوير كتقول: “أخلاقياتي والصدق ديالها فخدمتي عارفها كلشي واخا نكون غادي نلعب بلا فلوس”، وزادت كتقول: “هذ التصوير عمري ماخليتو، هوما اللي حبسو، وماعمرهم ما عيطو عليا باش نكمل، حتى كنتفاجئ بالفيلم كمل، ومن بعد تباع لMbc5”.

وتساءلات لهويتر فالتدوينة ذاتها “ويلا كنت أنا اللي خليتو، علاش مدعانيش منين محتارمتش الكونطرا, وعلاش غادي نحط شكاية ضدو فالمركز السينمائي ؟”، كيف تأسفات حيت الناس اللي كانو معاها ماكيهضروش، وقالت “هذشي فيه بزاف ديال الظلم وقلة النية”.

وكانت الممثلة تشكات، فتصريح سابق ل”كود”، لكون أن المخرج ديال الفيلم، فريد لحكيمي، قصاها من السيمانة اللخرة ديال التورناج، من بعد ما خدمات معاه 4 أسابيع على الفيلم، وقالت أنه حبس التصوير بحكم أن التقنيين ماتخلصوش، وجمع الدراري وكمل التورناج فالاخير بلا ما يعلمها، وبلا بيها.

وكتقول لهويتر بللي المخرج ماخلصهاش فالخدمة اللي دارتها حتى للآن، وماكانتش عارفة بللي الفيلم كمل حتى شافت مؤخرا لانونص ديالو، ومن بعد دوزوه فMbc5، وحيدو ليها الدور الرئيسي، وبدلو السيناريو فنهاية الفيلم.

وحاولات “كود” تتواصل مع مخرج الفيلم باش تاخد رايو فالموضوع، لكن مازال ماتلقات حتى جواب منو.