كود الرباط//

أثارت جريدة “الصباح” في ركن “تحت الدف”، واحد الملاحظة متعلقة بالتواصل الحكومي، واللي فعلا ولات مسألة مقلقة بزاف للصحافيين، ويتعلق الأمر الملحقين الاعلاميين أو المكلفين بالتواصل مع الصحافة.

المقال لي كتبو الزميل أحمد الأرقام، اللي كيكتب بزاف على العمل البرلماني، انتقد بشدة بعض السلوكات الصادرة عن المكلفين بالتواصل، وهادشي لي عاينتو “كود” مرارا مع هاد الحكومة، اذ لا يعقل أن الوزير كيبغي يجاوب على أسئلة الصحافيين وكيدخلو هادو لي مكلفين بالتواصل ويمنعو الزملاء من طرح الأسئلة. هاد فعلا مبقاو ملحقين اعلاميين ، هادو “كارد كورات”.

هاد القضية مزعجة بزاف، حيث واخا كاينين وزراء عندهم قدرة يتواصلو اكثر ويقنعو، كتلقا هادو حاجز للتواصل مع الرأي العام، وهادشي كيخلي بعض الاحكام المسبقة تصدر فحق هاد الحكومة لدرجة يتم وصفها بالحكومة الصامتة.

لبارح شفنا كيفاش رئيس الحكومة عزيز اخنوش، جاوب على أسئلة الصحافيين بكل سهولة وتفاعل معها. في المقابل وزراء اخرين كيهربو واخرين مكيخليوهمش المكلفين بالتواصل مع الاعلام أو لي وصفاتهم الصباح بـ”الكاردكورات”.