كود سبور//

كيتعتبر المنتخب الوطني المغربي الأكثر شبابا وسط المنتخبات اللي تأهلت لربع نهائي كأس العالم قطر 2022، وهو الدور اللي وصل له المغرب لأول مرة فالتاريخ ديالو، وغادي يلعب فيه ضد منتخب البرتغال السبت الجاي فتيران الثمامة فالعاصمة القطرية الدوحة.

وكيبقى معدل متوسط الأعمار فالمنتخبات الثمانية ديال ربع نهائي كأس العالم قطر 2022، قريب بزاف ما بين المنتخبات، وكيجي فالمركز الأول كأكبر منتخب فالسن البرازيل بمتوسط أعمار كيبلغ  27.9 سنة، وفالمركز الثاني منتخب الأرجنتين 27.8 سنة، ومنتخب كرواتيا اللي لعب ضد المغرب فأول ماتش من مونديال 2022، بمتوسط عمر كبيلغ 27.4 سنة.

وبخصوص منتخب البرتغال خصم المغرب فربع النهائي، كيجي فالمركز 4، ومتوسط العمر فيه هو 26.8 سنة، والخامس هو منتخب هولندا اللي متوسط أعمار اللعابا ديالو 26.6، ومن بعد منو فالمركز 6 منتخب فرنسا حامل اللقب اللي عندو 26.5، ومنتخب الننكليز هو السابع بمعدل 26.4، ثم المنتخب الوطني المغربي اللي هو أصغر منتخب فالسن فهاد ربع النهائي بمتوسط أعمار كيبلغ 26.2 سنة.