لاگوارديا سيپيل شدو جهادي صبليوني من أصل مغربي نشر رسائل مشفرة لدعم داعش وشروحات حول كيفية تصنيع المتفجرات
محمد سقراط-كود///
المغاربة من قديم الزمن وهوما مطبقين نظام التعاقد فالتعليم، ملي كان الفقيه ديال الدوار هو لي كيقري الدراري وكيكون مشارط مع الدوار هوما لي كيخلصوه سواء بالفلوس أو بالغلة بلا تدخل من الدولة، ولحد الآن باقي هادشي فالعروبيات وحتى فبعض الأحياء الشعبية، حتى الألفينات وكان فحومتنا فطنجة فقيه لي كيقري الدراري الصغار القرآن وماكلتو وشرابو على حساب سكان الحومة بالنوبة، ومن شحال هادي عرفو المغاربة بلي ماخاصش تعول على الدولة فشي حاجات، لذا كانو كيتعاونو بيناتهم فالبوادي عبر نظام التويزة، وإلى حتاجو شي حاجة كيجمعو ليها ويديروها، وكل مكان المخزن والدولة بعاد عليهم كل ما حسن.
فداك الوقت كان الفقيه كيعلم المغاربة الإسلام المغربي والخط المغربي والقرائة المغربية، وملي ولات عندنا دولة وولات هي المشرفة على هاد القطاعات الدينية والتعليمية، أصبح المغرب بحال شي حقل ديال التجارب، مرة تلقى الإسلام الصوفي هو لي غالب ومروج له ومرة تلقى البلاد حالة البيبان للإسلام الوهابي، مرة فرنسة التعليم مرة تعربيه، وكل مرة إينا ريح كيدينا على حساب الوضع، وحتى المعلمين ولاو قلال فيهم لي عندهم عقلية مغربية حقيقية بزاف منهم راه بحال إنكشارية الدولة العثمانية وسط منا، وريوسهم عامرين بالفريع ديال إلا صلاتي ما أخليها، وغزة رمز العزة وأردوغان إمام المسلمين، والنص فالدروس عندهم غير هدرة وحشو لرؤوس التلامذ بهاد الأفكار، وباغين الترسيم مع الدولة غير باش يضمنو مصيريف وعطل كافية لي تخليهم يتفرغو لهادشي.
جا الوقت فين خاص الدولة تهز يديها على الإنفاق العمومي، وخاص المغاربة يوليو يتقامو عليهم ولادهم غاليين باش على الأقل يوليو يفكرو شوية قبل ما يولدو ويطلقو فالشارع، وحتى القراية تولي غالية باش ترجع عندها قيمة ماشي بحال شواهد دابا لي صحابهم واحلين بيهم، وحل الحل ديال هادشي هو التعاقد فكاع القطاعات والمراقبة الصارمة للمتعاقدين ، وفنفس الوقت محاسبة صارمة للمبددين ديال أموال الدولة ولي كلاو ميزانيات البرامج الإستعجالية، خاص المحاسبة الحقيقية.