كود سبور//

خلقت قناة الرياضية الجدل المرة أخرى بالاستوديو التحليل اللي دارت بمناسبة كأس للأندية اللي اتفتتح اليوم الأربعاء فتيران طنجة الكبير، ومن جديد التغطية ديال القناة داكشي فيها باهت وحتى حاجة فيه ما تبادلات.

مواقع التواصل الاجتماعي فاضت بغضب الجمهور المغربي مرة أخرى على قناة الرياضية، بسبب الاستوديو التحليل اللي دايرا القناة لافتتاح كأس العالم للأندية، واللي كيشوفو بلي أنه ناشف وداكشي ما يرقاش لمستوى التطلاعات والإنتظارات، خصوصا وأن البطولة منظمة فالمغرب اللي كيتفنن فاحتضان الأحداث الرياضية ولكن هاد المنبر العمومي ما كيعرفش يروج ويسوق الصورة ديال لبلاد.

وكيشوفو بزاف ديال المغاربة أن قناة الرياضية، ما قدراش تواكب نهائيا التطور اللي كتعرفو كرة القدم المغربية والرياضة الوطنية، وخاص ضروري شي زحزحة لهاد القطب حيث هادشي فات الحدود وماشي هذا أول حدث كتفشل القناة فتغطيتها له حيث ما يمكنش يتقزم العمل لكبير ديال عدد من المؤسسات ومن بينها الجامعة الملكية المغربية لكرة القدم لتنظيم كأس العالم للأندية بالمغرب ويتم تقديمو فاستوديو فيه 3 الكراسي ومنشرط و 2 ضيوف يبقاو يعاودو نفس الكلام فكل حدث عالمي كيكون بالمغرب دون ما تعطيه قيمتو لدرجة ولاو بزاف ديال المغاربة كيقلبو على قنوات أجنبية وكيفضلوها باش يتابعو الرياضة المغربية والجديد ديالها.