نجوى المالحي-كود//

ظاهرة المؤثرات لي راس مالهم تلفون وأرقام مشرية ديال المتابعين غادية وكتكبر وهما كيزيدو في البسالة ديالهم.

هاد الأيامات نايضة صباط بين هدى حياني وأسماء العمراني وخدوج بلخياط ومونية الصنهاجي وحتى صفاء حبيركو بسبب معرض “بازار” لي كيدار كل رمضان.

الحرب بين هاد البنات نايضة على قبل تعويضات باش يديرو ستوريات ويضحكو على المغاربة ويقولو ليهم الجملة الشهيرة “كنتقاسمو معاكم هميزة وبون بلون”. وهو ماكين لا همزة لا هم يحزنون القضية فيها الفلوس وأقل “tague” في الستوري كيدوزوه ب 7 الاف درهم ونتوما طالعين.

امتى غادي نديرو حد لهاد “المؤخرات” كيف سماهم محمد الشوفي، امتى مايبقاوش يستغلو المغاربة.

هادو كيستغلوكم نتوما لي تابعينهم باش يشدو على ظهركم فلوس صحيحة، وملي يكَلسو في المجامع كاعما كيقولوها زوينة.

التأثير الحقيقي هو ديال الناس الي كتنتج شي حاجة، فن، علم، رياضة، كتب، أما نتأثر بيك وتأثر بيا من سيلفي، لا وألف لا.