عفراء علوي محمدي- كود//

راسلو المغاربة اللي حاصلين برا الملك محمد السادس باش يلقى ليهم شي حل، من بعد ما بداو الرحلات من وإلى الخارج، وتشرط عليهم يخلصو تكلفة الطيران اللي ما قدروش عليها، بسبب وضعيتهم المادية الهشة.

وقالو المغاربة الحاصلين فالخارج، فرسالتهم للملك اللي توصلات “كود” بنسخة منها: “نحن المغاربة العالقون بالخارج نستنجد بجلالتكم لأجل إجلاء فوري يراعي حالتنا المادية والنفسية بعد معاناة تتجاوز مدتها الأربع أشهر بعدة بقاع من العالم”.

وزادو المغاربة كيقولو، فالرسالة نفسها أن حالتهم النفسية ماكتتحملش تخاذل وتباطؤ الجهات الحكومية المعنية بإيجاد حل لإجلاء المغاربة العالقين، حيت بعدما كان عندهم أمل باش يرجعو، كيتفاجؤو بفتح الحدود، وبالشروط التعجيزية ديال الرجوع للبلاد.

وطالبو الملك باش يتدخل بشكل فوري وعاجل للحد من معاناة الآلاف من المغاربة اللي كيعيشو ف”القهرة”، بعيدا عن الوطن ديالهم، ويتدخل باش يتم ترحيلهم مجانا، ومراعاة حالتهم النفسية والمادية، كيف قالو أن معظمهم فوضعية هشاشة، وهذشي كيخليهم غير قادرين عن تحمل هذ الثقل ديال التكلفة المادية. اللي فرضاتها الحكومة.