عفراء علوي محمدي- كود//

استنكر الفاعل الجمعوي بجهة بني ملال خنيفرة، عبد الرحيم الكابوس، غياب الطبيب المكلف بتشريح الأموت فالقسم ديال الوفيات فالمستشفى الجهوي ببني ملال، وهذشي خلا، كيف كيقول، مجموعة دالناس يتسناو مع الجثث ديالهم لوقت طويل، ويحتجو حيت الطبيب ماكاينش.

الجمعوي دار فيديو كيهضر على مشاكل السبيطار الجهوي، لبارح الثلاثاء، كيقول فيه بللي خاص يكون طبيب دائم فقسم الأموات، وصارم فالعمل ديالو، ومختص فالتشريح “ماشي ديما نقولو الطبيب في اجتماع أو لقاء، هذا غير معقول، حيت الناس مقهورين فخاطرهم وكاينين ناس كيتسناو فالدواوير باش يديو الأموات ديالهن”، على حد قولو.

وتحدث الكابوس على مشكل آخر فالسبيطار، كيتعلق بارتفاع عدد الوفيات فصفوف الدراري اللي عاد كيتزادو: الوفيات فقسم الأطفال كبير اليوم، واصل لستة، وهذ الطبيب اشنو دورو فقسم الأطفال وهوما كيموتو بالإهمال، والكليماتيزور ماكاينش، كاين غير فبيروات الأطباء، وهذي مامعقولاش”، على حساب هضرتو.

وتوجه الجمعوي برسالتو للمدير الجهوي للصحة بجهة بني ملال خنيفرة، باش يتدخل فالقريب العاجل.

وحاولات “كود” تتصل بالمندوب الإقليمي للصحة فبني ملال والمدير الجهوي فجهة بني ملال خنيفرة، لكن الهاتف ديالهم صونا دون جواب.