وكالات //

تنازلات المرا اللي كانت اتاهمات المغني الميريكاني بوب ديلان باغتصابها قبل 60 عام هادي، (تنازلات) على الدعوى القضائية ضدو.

وقال المحامي “Orin Snyder”، من هيئة دفاع المغني اللي كان ربح جائزة نوبل للآداب، قال فتصريحو لوسائل الإعلام :” سالات لافير، حنا فرحانين مللي تنازلات المدعية على هادشي”.

واتاهمات هاد المرا، اللي بقات مامعروفاش شكون هي بالضبط، بوب ديلان، بالاعتداء الجنسي عليها، لمدة 6 دالسيمانات بين أبريل وماي 1965 فاش كان عندها غير 12 عام فعمرها داك الساعة.

و كتقول الدعوى القضائية بللي ديلان تسبب فضرر جسدي ونفسي كبير للبنت فاش كانت قاصرة، وبللي كان كيستاغل مكانتو وشهرتو كموسيقي وكيفرض عليها الشراب والمخدرات وكيمارس معاها الجنس بلا خاطرها وهي أصلا ماكانتش عارفة آش كتدير.

ولحد الساعة المحامين ديال المشتكية ماتكلموش وماعطاوش تفاصيل على هاد التراجع، ومزال مابانش علاش تنازلات هاد الضحية وفاش من ظروف.