ادريس اشويكة كود ///

في كاع المجالات كاينين متطفلين ومدعين كيدخلوا ليهم بحال السوسة وكينخروهم من الداخل باش يستفدوا منهم ويستغلوهم لأغراضهم الشخصية. ووخا هاكداك كيبقاوا قلال ومحسوبين.

ولكن في السوليما كثروا وتكاثروا وتوالدوا أولاوا جيش واعر ما يقدروا عليه لا الفرس ولا الرومان ولا الوندال ولا الميركان ولا حتى الماغول ! جيش ديال المتطفلين والمرتزقة استغلوا الفراغ القانوني والتنظيمي ديال القطاع وكجوا عليه بحال الدبان : ها لي عنده صيدلية خلى فرملية مكابلاها وجا إدير السوليما باش يتبند، هل لي كيدير لبروموسيون ديال الدوا كيسمح فيه وخى يتبريما، ها لي مدرس خلى الدراري بلا قراية ودار راسه ناقد سينمائي وولى كيصول وكيجول ويقرر في لجنة الدعم، ها لي أستاذ جامعى خلا الطلبة بلا تكوين ودار فيها منظر سوليماءي كبير…

عاد زيد الممثلين لي ولاو مخرجين بين عشية وضحاها… ودبا كملات وجملات وجا لي كحش كلشي، حنت كاين لي عندهم داعش وحنا عندنا كاحش، والكاحش ديال السوليما دبا هو المدير ديال المركز السينمائي، لي على غفلة مشى لتولوز تقدا واحد “الماستر” مغشوش وتعين مدير وهو مصمم باش يضربها بتلافة للسوليما وينتقم من السينمائيين الرواد حنت عندو معهم حسابات مبنية على الغيرة والانتقام من كاع لي انسحبوا من الغرفة لي استحود عليها بطريقة فاشستية اكثر من 16 عام وداروا غرفة جديدة مستقلة وديمقراطية… وغير تعين، آراك للمحسوبية والزبونية وسياسة باك صاحبي، تضامنا مع صاحبه وأستاذه فيصل لعرايشي وتابعه سليم الشيخ، والحمد لله لي عشنا حتى شفنا لجنة الدعم ولات مختصرة الدعم على صحاب المدير وزبانيته، ومانعاه بطبيعة الحال على “أعداء” المدير المقصيين من كل شيء ملي تعين…

هذا هو حالنا في مجالات الفن والابداع في هاد لبلاد السعيدة، لي تعين مسؤول على شي مؤسسة عمومية كيولي حاسبها ورث خلاه ليه الوليد ! وكيفسد فيها كيف بغا، حنت ما كاين لا حسيب ولا رقيب…

وآخر لعبة فاسدة زادت فرشات هاد الواقع المر هي عملية الاستهتار بمجموع المهنيين نهار الاحتفال باليوم الوطني للسينما، لي كالوا راه مخصص لجمع الاقتراحات ديالهم من أجل تعديل المرسوم لي كينظم الدعم السينمائي (في الانتاج والقاعات السينمائية والمهرجانات) في حين أن المرسوم المعدل طبخوه المنظمين قبل ودفعوه للأمانة العامة للحكومة أكثر من شهر قبل اليوم الوطني ! يعني كانت مجرد عملية در الرماد في العيون ديال المهنيين واعتبارهم مجرد كراكيز في عرض بايخ !..

وباش إزيدوا إدكوا المسمار في الجسم المترهل ديال المهنيين، صايبوا ثلاثة ديال اللجان، وحدة ترأسها هاداك لي كيبيع الدوا والمقرر ديالها موظف في وزارة الثقافة، ولخرين فيهم ربعة ديال المدرسين ! يعني كيف ما كلنا المهنيين مجرد كراكيز وخشيبات بالنسبة للسيد المدير وزبانيته، فقط لا غير !..

وربما كان القادم أفظع…