عفراء علوي محمدي- كود//

أجلات محكمة الأسرة بالولفة فكازا، اليوم الاثنين فالصباح، النظر فطلب تبوث النسب فالقضية المعروفة إعلاميا ب”ليلى والمحامي”، حتى ل9 فشهر مارس الجاي.

عبد الفتاح زهراش، دفاع المطالبة بالحق المدني ليلى الصرغاني، قال، فتصريحو ل”كود”، بللي السبب الرئيسي ديال التسجيل هو طلب محامين جاو جداد لمؤازلة المتهم محمد الطاهري من أجل إعداد الدفاع، والمحكمة وافقات على طلبهم.

زهراش شار بللي هيئة دفاع المحامي الطاهري طلبات من المحكمة تأجيل النظر فقضية تبوث النسب إلى حين صدور الحكم الجنائي المتعلق بالمشاركة فالخيانة الزوجية، والمحكمة رفضات هذ الطلب، ورجآت البت فيه إلى حين.

وزاد زهراش كيقول: “اللي كيهم كثر فالقضية هي الطفلة “نور” اللي ما عندها حتى شي ذنب ومجهولة المصير، ولازم نراعيو لحالها ونوقفو فجنبها أكثر من أي واحد آخر”.

وحضر زهراش وحيدا فهيئة محامين المطالبة بالخق المدني، بينما حضرو أغلب اعضاء هيئة دفاع الطاهري،

وكانت المطالبة بالحق المدني قدمات طلب لمحكمة الأسرة من أجل إثبات نسب الطفلة ديالها “نور” من المحامي محمد الطاهري، هذ الأخير اللي تابعاتو الزوجة ديالو بتهمة الخيانة الزوجية، قبل ما تتنازليه عليها من بعد وتتابع ليلى بالمشاركة فالخيانة الزوجية والتهديد والابتزاز عن طريق نشر الصور الشخصية هي واختها كريمة.