أسماء غربي-كود//
في وقت قصير قدر المغني المثلي المغربي بلال حساني يولي نجم حقيقي في فرنسا وهادشي قبل نهائيات حفل “اوروفيزيون” لي غادي يمثل فيه الفرانسويين في اسرائيل شهر ماي الجاي.
الكازاوي لي عندو غير 19 لعام خرج في حوار مع موقع “techniart” وكشف أن الحب ديالو للموضة بدا هادي 9 سنين ملي تعرف على المغنية الأمريكية ليدي كَاكَا لي كانت ديك الوقت كتصدم الناس بطريقة اللباس ديالها المثيرة والمختلفة تماما.
وبعد ما تبع المغنية الاستثنائية، قرر يمشي للحفل ديالها وتما جرب بيروك، ودار الشعر طويل وقال “عمرني ننسى النهار لي حطيت فيه البيروك على شعري، فرحت براسي بزاف وحسيت براسي قوي جدا”.
بلال لي ولى من أشهر المغنيين في العالم الفراكوفون، قال أنه ملي دار الشعر حس بأنه حر وقدر يعبر على جزء جديد من شخصيتو واضاف: “حسيت بالحرية. الشعر عالجني نفسيا”.
بلال غادي يمشي لإسرائيل في 18 ماي باش يغني في الحفل النهائي في مسابقة “أوروفيزيون”.
