هناء ابو علي – كود كازا ///

مشهد البارح فسوق لحوالة فالحي الحسني فكازا مشهد ماشي مرعب وصافي ماشي بل خطير بزاف بزاف. حنا فحالة الطوارئ. كلشي بيد الداخلية. قررات وزارة الداخلية تتحكم فكلشي. الولاة ومعاهم العمال وتحتهم القياد واعوان السلطة عندهم سلطات كبيرة. المنتخبون ما بقى عندهم دور. كل ما عندو علاقة بالامن تحت يدين وزارة الداخلية.

مشهد شفرة لحوالة وارهاب فلاحين صغار عام وهما كيتقااتلو باش يريبو حوالى ويسمنوهم ويبيعوهم فالسوق. ايلى فاتت هاد المناسبة مشى ليهم العام. يقدرو يموتو بالجوع. جاو لكازا ولمدن اخرى فالمغرب وفالاخير يتعرضو للشفرة وبالنهار گهار.

بيان ديال الادارة العامة للامن الوطني كان اعلن البارح باللي بوليس الحي الحسني “ضبط 20 شخصا للاشتباه في تورطهم في أعمال العنف والسرقة والرشق بالحجارة التي شهدها سوق لبيع الأغنام  بمنطقة “أزماط” بمنطقة مدارية بالمدينة”

هاد البيان شد اللي ضربو بالحجر وشفرو وهددو فلاحة. لكن القضية هنا ما تحلاتش. خاص محاسبة المسؤول الاول فهاد الفيلم للي هو وزير الداخلية عبد الوافي لفتيت. فحالة الطوارئ كلشي بيد الوالي فالجهات وهو رئيس هاد الولاة 12.

الداخلية ما دارتش خدمتها. ما امناتش سوق لغنم. غير فليام العادية كيكون الامن حاضر بشكل كبير مابالك فزمن كورونا فيروس.
عنداكم ضربو الحيط القصير شي باشا او قايد او حتى عاملة عمالة الحي الحسني. راه غير ظلموهم. اللي خاصو يتحاسب بالدرجة الاولى هو الوالي دكازا حميدوش ومعاه وزير الداخلية. ياك دابا عندو سلطات كبيرة. باش يدير خدمة مزيانة خاص الاشادة بيه وتكريمو وباش يقودها خاصو يخلص.

خروب بلادنا كنعرفوه. عارفين قوة الداخلية فزمن بنعرفة. واش هاد الوزير كيبان ليه باللي اللي دار عامل انفا٬ اللي تظلم٬ يستحق الاعفاء٬ وهاد التسيب اللي كيضرب الدولة فالصميم٬ ما يستحقش يتحاسب هو نيت