كود اسماء غربي ////

هادي ايام كاين دوباج غير عادي من قبل جهات فالدولة لحزب الاستقلال او بالاخص حزب تيار لفاسة اللي مقدمين ليه نزار بركة اللي مزوج ببنت عباس الفاسي وعائلة مزوار عبد السلام بنمشيش. قبل ما نوضحو اش كيديرو فهاد الدوباج واش نا هي خطة هاداك الغبي اللي طيح عليهم الفكرة. نبداو من الاول.

كيفاش وصل نزار بركة لهاد المنصب. غير تذكير راه كلشي عاقل على هاد الشي. جهة فالدولة فايام حكومة بنكيران دارت الدوباج لحميد شباط. فكرات دير ضغط عليه وجابت شباط باش يوقف ضد هيمنة لفاسة على حزب الاستقلال. دعماتو بكلشي. الخطة كانت هي ياخد حزب الاستقلال ويقضي على الجناح الفاسي فهاد الحزب وفنفس الوقت يضرب حكومة بنكيران.
دار الجزء الاول وفشل فالجزء الثاني. خرج حزب الاستقلال من حكومة بنكيران باش طيح. ما طاحتش وتعطات الاوامر باش يدخل حزب التجمع الوطني للاحرار. طبعا تعطات الامور حقاش جزء اخر فالدولة كان ضد هاد الخطة ديال الاطاحة بحكومة بنكيران. كانو مازال محتاجينو لامور اخرى والشارع ديك الساعة مازال ما تبردش.

طلع شباط واستمر فضرب التيار الفاسي. جات الانتخابات وطلع بنكيران مرة اخرى وتبدلات الخطط. سالى وقت حميد شباط وهاد الاخير فهم معطل. الغريب ان شباط اللي كان غادي يكون سبب فالاطاحة بحكومة بنكيران فالاول غادي يولي سبب باش ما يديرش بنكيران حكومتو بعد ما سحق البام ورجالات البام اللي وراه وجهة فالدولة راهنات عليه. اللعب تغير. حزب العدالة والتنمية كان قابل يدير هاداك الشي اللي كيدار فاحزاب اخرى. دارو المؤامرة ضد صاحبهم اللي ربحهم الانتخابات وطيروه وجابو بنعرفة بدون شخصية بدون كاريزما.

باش بغاو يتخلصو من حميد شباط اللي ولى حجرة فسباط ديك الجهات فالدولة ما مشاوش عند نزار بركة حقاش ما فيدوش ما عندو والو فالحزب. مشاو عند استقلالي اخر عندو نفس القوة ديال شباط اللي هو حمدي ولد الرشيد. فالحقيقة هو ماشي استقلالي هو حزب قائم بذاتو. بحال شي دويلة صغيورة. قادر بقوتو بشخصيتو بحضورو بكاريزما ديالو يمشي لاي حزب ويدي نص مقاعد الجهات الجنوبية فالمغرب. =جهات كلميم والعيون والداخلة=. الولاء ليه فهاد الجهات ماشي لحزب الاستقلال.

حمدي ولد الرشيد فالمؤتمر اللي جرى على شباط هو اللي امن المؤتمر. جاب ناسو هو اللي وكل المؤتمر جات تريتور ديالو من العيون. هو اللي قاد كلشي. ولد الرشيد فمشهد غريب وجد كلشي لنزار بركة. كلشي عاقل كيفاش كان نزار فهاداك المؤتمر. بحال شي ضيف. كان كلشي موجد. الدولة تحزمات بولد الرشيد باش يوصل نسيب عباس الفاسي لرئاسة حزب عباس الفاسي.

حمدي ولد الرشيد ماشي ساهل. امن كان اجهزة الحزب. طلع قائمتو كلها فاللجنة التنفيذية. عندو تحكم فالشبيبة فالنقابة من خلال ميار نعمة ديالو. عندو ناسو فاللجنة المركزية. متحكم فكلشي ومن غدا ايلى بغى يجري على نزار بركة يجري عليه.

هادا كيفاش وصل هاد نزار.

دابا هادي اسبوع تقريبا بدات خطة ديال ان البديل لحكومة بنعرفة هو حزب الاستقلال. بغاو يحسبو لنزار اللي كان كي شي امانة٬ اللقاء التاريخي للي دارو حمدي ولد الرشيد فالعيون وحضر ليه 50 الف شخص. هاداك لقاء ولد الرشيد ماشي لقاء نزار او الاستقلال.

الخطة هو ان نزار بركة هو المخلص من هاد الحكومة من الاسلاميين ماشي شي حد اخر. جهات كثيرة بدات فهاد المخطط. كونسيربت جديد ديال الانخراط تطلق. جولات كتوجد. كلشي دايز على حمدي ولد الرشيد او عندهم الترخيص منو. عملية الاستقطاب بدات وغاديين تشوفو اش كيوجدو من دابا.

شخصية رئيس الحكومة المقبل مهمة لمستقبل البلاد. خاص يكون رئيس الحكومة بشخصية بقدرة على مواجهة الشارع والتفاهم مع القصر والقدرة على التواصل. هاد الشي كولو ما كاينش فنزار بركة. يقدر يكون وزير مالية مزيان او وزير لوزارة تقنية ماشي سياسية ولكن من غيرها ما يقدرش. شوفو غيرصورتو فالعيون وهو جالس اللاور بحال شي تلميذ وحمدي ولد الرشيد فاول الصورة كيهدر فالتلفون كتوضح كلشي.

بحال نزار بركة غادي ماشي يضر البلاد. غادي يجبد تحكم ال الفاسي فحياتنا السياسية والاقتصادية والمالية. غادي يجبد شبكة علاقاتهم وتحكمهم وتحالفهم التاريخي مع المخزن. ايلى وقع غادي يخرج على البلاد باختصار. يخرج عليها حقاش ماشي اختيار المغاربة بل اختيار جهات اخرى تفرض على لمغاربة.