الرئيسية > آراء > الله يصبر عائلات الضحايا والله يرزقنا الصبر مع هاد الاسلاميين لي كايحاولو يركبو على هاد الحادثة للارهابية باش يتبوعو علينا الظلامية و الاقصاء ديالهم و يحاولو ينسيونا فيه
17/03/2019 15:00 آراء

الله يصبر عائلات الضحايا والله يرزقنا الصبر مع هاد الاسلاميين لي كايحاولو يركبو على هاد الحادثة للارهابية باش يتبوعو علينا الظلامية و الاقصاء ديالهم و يحاولو ينسيونا فيه

الله يصبر عائلات الضحايا والله يرزقنا الصبر مع هاد الاسلاميين لي كايحاولو يركبو على هاد الحادثة للارهابية باش يتبوعو علينا الظلامية و الاقصاء ديالهم و يحاولو ينسيونا فيه

سهام البارودي – كود//

ايه العمل لي وقع البارح عمل ارهابي عنصري وحشي مايمكنش انسان سوي يساندو و يكون معاه ! و مايمكنش تكون انسان سوي و ماتأثرش بداك الفيديو الرهيب لي تنشر و لي كايبين عباد الله كاطيح بالقرطاس واحد تابع لاخر ! الله يرحمهم و يصبر عائلاتهم و صحابهم و يبدل محبتهم بالصبر.

ولكن كلو كوم ! و الركوب ديال الاسلاميين على هاد الحادثة الارهابية كوم ثاني !

بصح ماكايحشموش هاد الناس ! وا ماعندهمش المراگات‌! و حتى الحزن و الموت كايبغيو يستاغلوه سياسيا و يدغدغوا بيه عواطف عباد الله.

شي وحدين مازال مادازتش ساعة على العملية الارهابية خرجو لينا بتصويرة بعض الحقوقيين المغاربة ” واك واك علاش ماخرجوش يضامنو مع نيوزيلاندا ” ” واك واك علاش ماهزوش الشموع على ضحايا نيوزيلاندا ”

وا خليوهم غا يحلو الحوانت و يشريو الشمع بعدا !

و كاينشرو فالاكاذيب و المغلطات باش يبانوا انهم مضطهدين و محگورين و تاواحد ماكايتسوق ليهم و هوا العالم كامل مقلوب بالعملية الارهابية و الناس خرجو من جميع بقاع الارض كايعلنو تضامنهم مع عائلات الضحايا !

شنو بغيتو ؟ علاش كاتقلبو فاش كاتبقاو تأججو مشاعر عباد الله بهاد الطريقة ؟

الضحايا الحقيقين هوما هادوك لي ماتو ! و لي يستاهلو التضامن هوما عائلاتهم ! نتوما لا ! نتوما ماشي ضحايا ! نتوما ارهابين كاتحاولو تركبو على الضحايا و تلبسو لباس الضحية.

كانحس بيهم فحالا جاتهم اوكازيو من الجنة و الناس باش يتبوعو علينا عاوتاني الفكر الظلامي و الهمجي ديالهم ! و فحالا كانو كايتسناو فحال هاد الحادثة باش يكتبو ديك ” الارهاب لا دين له “. فرحانين فدواخلهم و كايحاولو يقتاسمو تهمة الارهاب مع شي حد آخر..

لا آ سيموحمد ! آجي نعاودو الدرس من الأول ! كون انه وقع عمل ارهابي البارح فنيوزيلاندا ضد خوتنا المسلمين ماغاديش يمسح السما بليگة على الجرائم البشعة لي كاتوقع فالعالم كامل باسم الدين الاسلامي ، جرائم طالبان ! و داعش ! و جبهة النصرة ! و منظمة الشباب الاسلامي فالصومال ! الجرائم البشعة لي وقعات فالعشرية السوداء ضد الجزائرين باسم الدين (و الدين منها براء)! سلسلة العمليات الارهابية فمدريد لي قتلات اكثر من ميتين بريئ و باريس و لندن ! الباطاكلون ! شارلي ايبدو ! الكاميو لي طحن عباد الله فنيس  و شلا جرائم وقعات و كاتوقع كل نهار باسم الدين الاسلامي و شي مرات بين المسلمين بعضياتهم ( السعودية و اليمن للمثال و ليس الحصر).

تاحاجة ماغادي تغطي على الهمجية و الظلامية لي كايمارسوها بعض الاسلاميين باسم الدين.

شنو غايستافدو المسلمين من اطلاق هاشطاغ #الارهاب_المسيحي من طرف بعض الاسلاميين ؟

شنو معنيتها بعض الخوانجية يكتبو فبروفيلاتهم ” إن الكافرين كانوا لكم عدوا مبينا ” ؟

واش إعلان حرب ؟ واش لقاو السبة باش يبررو عاوتاني شي ارهاب مضاد ؟

واش باغيين يكحلوها علينا اكثر ماهي كحلة زحلة؟

العملية الارهابية لي وقعات فنيوزيلاندا ماخاصهاش تنسينا اننا تاحنا كانعيشو مع ارهابيين ! ولاد بلادنا عايشين معانا كاياكلو و يشربو و ارهابيين ! ظلاميين ! ضد التفكير الحر و ضد المرأة و ضد الحريات الفردية ! كاينشرو الكراهية باسم الدين ! كراهية كل ماهوا مختلف ! كراهية المثليين لي كايسميوهم ” شواذ” و ماكرهوش يلوحوهم من شاهق ! كراهية المرأة لي مابغاوهااش تتساوا فالارث مع الراجل و مابغاوهاش تلبس مابغات ! كراهية الجمال و الاناقة و الأنوثة و الموسيقى و الفن.

الفرق بينهم و بين ارهابي نيوزيلاندا هوا انهم ماعندهمش سلاح ! و كون كان عندهم السلاح و شوية ديال البوفوار كون ناضو سوطونا و سلخونا و سحلونا فالطرقان و الأسواق فحال لي كايديرو خوتهم فداعش.
داكشي علاش بالنسبة ليا انا شخصيا ! لاكنتي ظلامي! إقصائي ! ضد الحريات و حقوق الانسان بمفهومها الكوني ( ماشي بمفهومها المشوه ) راك تانتا ارهابي !  فحالك فحال هاداك ديال نيوزيلاندا !

بجوجكم دينمكم ماتستاحقوش تعيشو فالقرن الواحد و العشرين ! و من عندي انا خاصهم يجمعوكم و يلاقيوكم فشي صحراء قاحلة و يخليوكم تتقاتلو مع بعضياتكم ! الظلام كونطر الظلام !

فبلا ماتحاولو ضورو الطبسيل لشي جيهة أخرى … همجيتكم حاضرة فالتاريخ و شاهد عليها العالم كامل .

موضوعات أخرى

29/03/2024 12:50

تفاصيل حصرية على وضع منسقة جهوية لحزب سياسي بجهة فاس مكناس فالحراسة النظرية: خدات من الضحايا فلوس صحيحة وصلات 18 مليون والمدير الجهوي ديال الضرائب هو اللي فضحها

29/03/2024 12:25

خاص.. وضع المنسقة الجهوية لحزب سياسي بجهة فاس مكناس فالحراسة النظرية بسبب قضية كبيرة ديال النصب والاحتيال والتزوير

29/03/2024 12:00

السلطات المغربية قبلات العودة ديالهم.. گاع الحراگة اللي استغلو الموڤيطا ديال الثلاثاء الفايت وحرگو لسبتة رجعو تا اللي بالغين ودارو راسهم قاصرين

29/03/2024 11:30

الدريب لـ گود: الناصيري عطى لكثير للوداد وهادي صفحة وطويناها ودابا حقبة جديدة برئاسة البرناكي وغنخدمو لإرضاء الوداديين

29/03/2024 11:00

البوليساريو بغات تستاغل الرئيس السنگالي الجديد وكتزاوگ فيه يدير معاها علاقات

29/03/2024 10:40

جدل امتحان البيرمي.. “نارسا”: كاين تطور إيجابي فنسبة نجاح المترشحين فاليوم الرابع ووصلات لـ54,41 فالمية

29/03/2024 10:30

بلقشور: الوداد تحملو مسؤوليتهم والجموع العامة دازت مزيان وتم التصويت على گاع التقارير ومبروك عليهم

29/03/2024 10:21

تقرير رسمي: أسعار الصناعات الغذائية فبلادنا تراجعات وإنتاج وتوزيع الما والضو مستقر