كود مصطفى الشاذلي ////

هدوا للعابة ديال الوداد الرئيس بالإضراب عن التداريب إلى بقا كيماطل فيهم ومعطاهمش فلوسهم لكيتسالو من العام لفات، خصوصا أنهم ربحاو البطولة وغادين مزيان في عصبة الأبطال.

اللاعبين قالو للناصيري عطينا منح التوقيع، ديال العام لداز وهاد العام، لأن كان داير معاهم الناصيري باش اعطيهم جزء من لفلوس مني اسالي العام، والجزء الثاني مني ارجعو من العطلة وبداو التداريب.

وحتى لدابا اللاعبين مخداو والو، وطالع ليهم الدم مزيان، واقدرو في أي وقت اديرو اضراب عن التداريب، إلى معطاهمش الناصيري فلوسهم لكيتسالو.

واخا الناصيري عطاهم شي بريمات ديال الماتشاش معجبهمش الحال، وقالو ليه بغينا فلوسنا ديال منح التوقيع، لكيشدو فيها ملايين صحيحة، ماشي بحال منح التوقيع.

وكيبان أن الوضع داخل الوداد الرياضي ماشي هو هداك لأن اللعابة طالع ليهم الدم من المدرب عموتة بسباب التصريحات ديالو والموافق القاصحة ديالو، وطالع ليهم الدم من الناصيري، معطاهمش فلوسهم، وكين خلاف آخر بين الرئيس والعموتة، لأن باغين افرضوا عليه لاعبين هو مباغيهمش، ودار تصريحات كينتاقد فيها هاد القضية.

وكيبان أن مسيرة عموتة مع الوداد مغاديش طول هاد العام اقدر اجريو عليه قبل الوقت، وجيبو مدرب آخر اكمل بيهم العام.