عفراء علوي محمدي- كود//

بحال العادة كل أربعاء، دار سوق الجملة للفواكه والخضر التابع للمجلس الجماعي لمدينة كازا، اليوم،  ليست ديال الأثمنة الخاصة بالمنتوجات الفلاحية اللي كيتباعو بالكَرو فهذ السيمانة، باش يحدد السقف ديال الأثمنة والثمن الأدنى ديالها حسب جودة كل منتوج، وماتكون حتى شي زيادة فهذ الوقت اللي كتعرف البلاد حالة طوارئ صحية بسبب فيروس كورونا المستجد.

بالنسبة لثمن اللحم بالجملة فالباطوار ديال كازا، فهذ السيمانة غلا ثمنو ما بين 5 حتى ل7 دراهم، وبالتالي لحم الغنمي ولا يدير دابا فالثمن الأدنى 52 درهم والثمن الأقصى 56 درهم للكيلو، والبكَري فالثمن الأدنى 55 درهم، والثمن الأقصى 60 درهم للكيلو.

أما الخضرة، الأثمنة ديالها تغيرات بسنتيمات قليلة، باستثناء بعض الخضر اللي عرفات زيادات طفيفة، وهكذا حدد السوق الأثمنة ديال الخضرة الأساسية بالكيلوكَرام ف: ماطيشة 1 درهم فالثمن الأدنى و2 دراهم و20 سنتيم فالثمن الأقصى، وخيزو 1 درهم و50 سنتيم فالثمن الأدنى و2 درهم و50 سنتيم فالثمن الأقصى، البصلة 3 دراهم ونص فالثمن الأدنى و5.50 دراهم فالثمن الأقصى، باطاطا 1 درهم و70 سنتيم فالثمن الأدنى و2.20 دراهم فالثمن الأقصى، البصلة الخضارية 1 و20 سنتيم فالثمن الأدنى و2 دراهم ونص فالثمن الأقصى.

وبخصوص الخضر لخرى، فالمكور أو الكرومب كيدير 70 سنتيم فالثمن الأدنى و1 درهم و20 سنتيم فالثمن الأقصى، والكَرعة الخضرة كتدير  2 دراهم فالثمن الأدنى و3 دراهم ونص فالثمن الأقصى، والخيار 1.80 دراهم فالثمن الأدنى و2 دراهم ونص فالثمن الأقصى، والدنجال درهم و80 سنتيم فالثمن الأدنى و2 و80 سنتيم فالثمن الأقصى، والكَرعة الحمرا 2 دراهم فالثمن الأدنى و5 دراهم فالثمن الأقصى.

أما بالنسبة للفواكه، عرفات استقرار تام فالأثمنة بالمقارنة مع السيمانة اللي فاتت، لافوكا دايرة فالثمن الأدنى 25 درهم، والثمن الأقصى 35 درهم، البانان دبرا داير 9 دراهم الثمن الأدنى و12 الثمن الأقصى، البنان دالبلاد 5 دراهم فالثمن الأدنى و7 دراهم و30 سنتيم فالثمن الأقصى، الليمون 4 دراهم فالثمن الأدنى و6 دراهم فالثمن الأقصى، والتفاح دالبلاد 2 دراهم الثمن الأدنى و8 دراهم فالثمن الأقصى، والتفاح المستورد 8 دراهم والثمن الأدنى و13 درهم ونص الثمن الأقصى، والدلاح درهم ونص أقل ثمن و3 دراهم الثمن الطالع كَاع.