سهام البارودي – كود//
فحياتي زرت بزاف د الشواطئ فالمغرب و عمت فيهم ولاحظت كيفاش المد الظلامي الهايشمايشي وصل للشواطئ و كيفاش عدد العيالات بالمايوات قل بالمقابل ولينا كانشوفو بزاف د العيالات كايعومو بالبيجامات و الدرابل للاسف ولكن بالرغم من هادشي مازال تقدر البنت اليوم تعوم فبزاف د المناطق فالمغرب بخاطرها ( ماشي شي خاطر عاوتاني) ولكن بلا مايعريوها هايشر و بلا ماتعرض للاغتصاب فحال فشي بلدان قريبة لينا ! و هادشي كايرجع بشكل كبير للقيادة الرشيدة لسيدنا و للدفاع ديالو على المرأة حيت بغينا و لا كرهنا حنا العيالات فالمغرب مباركين بأنه عندنا ملك حداثي فكر لينا فالمدونة و فمجموعة من القوانين لي كاتحمينا نوعا ما واخا مازال المجال مفتوح للنقاش ! ولكن كون عولنا على الاحزاب السياسية لي مقاتلة غا مع المرقة د الانتخابات كورا صورنا غا الريح ! ايه تا ديك لي كاتسمي راسها حداثية و تقدمية ماعندهاش القلاقل النحاسية باش تدافع على حقوق المرأة و الحريات الفردية حيت كاتخاف تفقد الاصوات ديال هايشر فالانتخابات !
اليوم ملي بان موضوع التحرش فوسائل التواصل الاجتماعي اللحايا و صحاب قال الله قال الرسول مابغاوش يزگلو الفرصة بلا مايفكرونا بلي حنا رباعة المغربيات المتبرجات بلي خاصنا “نتستروا” و كون نلبسو الحجاب احسن لينا ! اللحية عوض يدخل سوق كرو و يعتارف بلي التحرش جريمة ماكاتبررها حتى حاجة و خصوصا اللبس ! و بلي حتى فمكة المكرمة مو يقدرو يتحرشو بيها و يبوانتيو فيها لا ! هوا ساد عينيه و وودنيه على الواقع و باغي يحل غي زكو باش يقولينا تحجبوا ! تغمغموا ! لبسو النقاب ! خشيو راسكم وسط الدرابل !
ايوا لا آ سيموحمد ! انا بعدا ماغاديش نتحجب و ماغاديش نغمغم راسي و شبابي وسط الدرابل و هاكا! بزاف ديال العيالات فحالي رافضين هاد الافكار القروسطية و غايدافعو على حقهم فاللبس و ممارسة الحرية ديالهم و الحضور بشكل قوي فالفضاء العمومي و لي تحرش بيهم غايمشي يتربى و نشوفو طلامط ديال صالونهم و مو كاتبكي فاليوتوب!
