نجوى المالحي-كود//

في عيد الحب لي كان نهار الجمعة انتشر فيديو ديال مغربية ركعات على ركابيها باش تطلب الزواج من جديد من راجلها.

بزاف ديال المغاربة خداتهم العاطفة وعجبهم شنو دارت وصفقو ليها وشجعوها وقالو هادا هو المغرب لي باغيين، مغرب الحداثة والتفتح، ومغرب فيه العيالات حرات وقدات وكيهرسو التقاليد.

هادشي كامل زوين، لي خايب أن السيدة لي في الاصل هي انستكَراموز مدارتش هادشي حبا في راجلها فعلا، ولكن في اطار شراكة شادة عليها الفلوس وراجلها لي بان مصدوم كان عارف الفيلم كامل من A حتال Z.

لي متبع صفية التازي غادي يعرف أن أي بوسط كتحطو في صفحتها ماكيكونش فابور ولكن مؤدى عنه. وأي فيديو كيكون موراه فريق قد السخط لي كيوجد كيفاش يخرجو للواقع.

صفية وقبل الفيديو لي تنشر بزاف، كانت من المشاركات في برنامج “سيدات الشوبينكَ” لي كيدوز في دوزيم. مشاركتها تخلصات عليها أيضا بمبلغ وصل ل 50 ألف درهم فيها 3 أيام متواصلة ديال التورناج مع 3 ديال الأسماء أخرى.

من غير هادي، السيدة خرجات في حوار مع موقع إلكتروني هي وراجلها في عيد الحب نيت بنفس اللبسة.

الحب زوين، والحداثة مزيانة، لكن الضحك والطنز على بنادم باسم الحب لي مخلصين عليه، هادي ناقصة وبزاف.