كود سبور//

ودع منتخب الكاميرون حتى هو كأس العالم قطر 2022، من بعدما واخا ربح اليوم الجمعة، منتخب البرازيل فالجولة الثالثة عن لكروب 7 من البطولة.

وربحت الكاميرون الماتش ديالها ضد البرازيل بواحد لزيرو، ولكن هادشي مكانش كافي باش تاهل لثمن نهائي كأس العالم حيث فنفس الوقت ربحت سويسرا صربيا بنتيجة 3 مقابل 2 فنفس لكروب والجولة.

وتصدرت البرازيل لكروب 7 برصيد 6 النقاط، وتأهلت لثمن النهائي هي وسويسرا صاحبة المركز الثاني وحتى هي عندها رصيد 6 النقاط ولكن الامتياز عند البرازليين، والكاميرون احتلت المركز الثالث برصيد 4 النقاط وتقصات هي وصربيا اللي عندها 0 نقطة.

وغادي تلعب البرازيل متصدر لكروب 7، فثمن نهائي كأس العالم، ضد كوريا الجنوبية اللي ثانية فلكروب 8، وسويسرا الثانية فلكروب 7، غادي تلعب ضد البرتغال متصدرة لكروب 8.

للاشارة فالمنتخب الوطني المغربي ومنتخب السنغال فقط من إفريقيا اللي تأهلو لثمن نهائي كأس العالم قطر 2022، من أصل 5 المنتخبات مشاركة فالبطولة وتقصات تونس وغانا والكاميرون من الدور الأول.