كود – كازا ///

قالت جريدة لاكرونكيا، أن الشرطة الإسبانية شدات، مؤخرا، مغربي كيبلغ من العمر 36 عام، مباشرة بعد رجوعه من المغرب، وذلك بسبب علاقته بسرقة 110 سمارتفون ف مدريد. وتبلغ القيمة الإجمالية لهاذ البورطابلات أكثر من 120 ألف يورو.

وأضافت الصحيفة ذاتها، أن جرائم السرقة كان عدد منها مقرون باستخدام واستهدفات حشود الناس ف المراقص والنوادي الليلية ف مدريد. ولقاو الحرس المدني المسروقات ف دجنبر الفايت مخبيين ف گراج ديال الطوموبيلات وسط العاصمة الإسبانية.

وحسب المعلومات المنشورة، هرب المتهم للمغرب بعد ما عرف ان لاگوارديا سيپيل عرفو بلاصة المسروقات اللي رجعوها الضحايا ومنهم عدد كبير ديال التوريست من أستراليا والفلبين وكندا والولايات المتحدة الأمريكية وفرنسا وإيطاليا وإنجلترا ودول أخرى.

مول الفعلة بقى ف المغرب عدة أشهر حتى تبرد القضية، ورجع الاثنين الفايت، لكن غير حط رجليه ف اسبانيا شدوه البوليس. وتعرف أحد ضحايا عمليات السطو عليه وأكد البوليس بأنه الشخص اللي دفعو داخل ملهى ليلي وخطف ليه السمارتفون ديالو..