عفراء علوي محمدي- كود//

قرر سيناريست مسلسل “شهادة ميلاد”، محمد عيسى العفاز، يرفع دعوى قضائية ضد خالد النقري، مدير إنتاج مسلسل “ياقوت وعنبر” بسبب ما وصفه ب”التشهير المجاني”، بعدما كان وضع النقري شكاية ضدو، كيتهمو فيها بسرقة سيناريو المسلسل ديالو، وقام بالتصريح بهذشي للصحافة.

العفاز قال، أن سيناريو “شهادة ميلاد” مختلف تماما على سيناريو “ياقوت وعنبر”، ووضح انه كاين تشابه فقط فالبداية، اللي كيكون فيها القاسم المشترك بيناتهم هو تغيير الابن بالبنت أثناء الولادة، ومايمكنش الحكم بالتشابه فقط استنادا على هذشي.

وأكد العفاز، فتصريحو ل”كود”، أنه إلى كان سيناريو “ياقوت وعنبر” تعرض على شركة إنتاج أخرى ف2018، فسيناريو “شهادة ميلاد” كان تقدم للقناة الثانية “دوزيم” ف2017 باسم آخر، وتم الرفض ديالو، قبل مايتقدم باسم “شهادة ميلاد” لشركة “سيدارز أرت بروداكشن” و شركة “سبيكتوب” باش يتعرض من بعد فMBC5.

واستنكر العفاز اعتبارو شخص غير معروف فالساحة من طرف النقري، على اعتبار أنه خدم فمجال الصحافة 30 عام، وحبس ف2009، وقال انه دابا صحافي متقاعد تعاطى لمجال السيناريو، وعندو أعمال كثيرة تبثات فالقناة الأولى والأمازيغية، وأن اسم “محمد عيسى العفاز”، هو اسم فني، اختارو طواعية باش يقدم هذ العمل لاعتبارات شخصية، “وهذي ماشي أول مرة كنشتغل باسم مستعار، بحيث عندي اسم آخر نشرت بيه العديد من الأعمال فالصحافة، وتعرفت بيه”.

فالمقابل قال خالد النقري، مدير شركة إنتاج “ديسكونيكتد” بللي التشهير بشخص ما كيكون فعلا إلى كان هذ الشخص معروف، وتم الحديث على الاسم ديالو الحقيقي وماشي المستعار “حنا بعدا خاصنا نعرفو شكون هذ الشخص أولا، عاد يمكن يكون التشهير، لكن إلى حس بينا هو شهرنا بيه يمكن يلتجأ للقضاء، شخصيا هذا أحب مكان عندي، خصوصا فاش كنمشي على حقي، وأنا مكانهربش من المؤسسات، وكنتكلم بوجه مكشوف”.

وأكد النقري، فتصريحو ل”كود”، ان مجال السمعي البصري والمنظومة الإنتاجية ككل خاصعة للقوانين والقواعد ديالها، ومايمكنش أي واحد يجي ويستعمل اسم مستعار على هواه بلا ما يعرم المركز السينمائي المغربي، وزاد: “فاش ديبوزينا الشكاية فالمركز، المركز براسو ماعرفش شكون هذ الشخص، وراه فتح تحقيق فالقضية وغايدير الإجراءات ديالو”.

وبالنسبة لسرقة السيناريو، قال منتج “ياقوت وعنبر”: “توجهنا للمركز السينمائي دابا لكن حتى حنا غنتوجهو للقضاء، لأننا حنا معروفين ومعروف شكون دار السيناريو ديالنا، لكن هو بغينا نعرفو غير شكون بالضبط باش نعرفو شنو نديرو، حيت استعمالو لاسم مستعار خاص يعلم بيه المركز السينيمائي المغربي باش تكون الشفافية”.

وللإشارة، فسبق لخالد النقري حط شكاية للمركز السينمائي المغريبي، كيتهم فيها سيناريست “شهادة ميلاد” بسرقة سيناريو “ياقوت وعنبر” اللي دارتو الممثلة سامية أقريو.