هناء ابو علي-كود//
في انتظار تأكيد تعيين الكونغريس الامريكي لدافيد فيشر اللي اختارو ترامب كسفير للميريكان ف المغرب هاد الايامات، وهو من بين ابرز داعمي ترامب و احد الصناعيين المعروفين.القائمة بالاعمال ف السفارة د ميريكان ف الرباط السيدة مايلي احتفلات البارح باليوم الوطني للمارينز ف مقر السفارة .
وكالعادة لبسات تكشيطة مغربية زرقاء وتصورات مع جنود المارينز اللي لبسو لباس الحفلات الخاص بهم.
المعروف ان هاد جنود البحرية هما اللي مكلفين من قديم بأمن السفارات الامريكية ف جميع انحاء العالم.
للاشارة ف مند تعيين السفير السابق ف عهد اوباما، دوايت بوش ، بدات السفارة الامريكية كتنفتح على المجتمع المغربي خصوصا باستعمال صفحة الفايسبوك، وبقاو كايستعملو الدارجة بزاف و اغلب العاملين لاو كايلبسو ملابس مغربية، وهاد القضية باينة غادي تبدل مع السفير الجديد الجمهوري اللي غادي يركز اكثر على البرتوكولات و البحث عن الاستثمارات.
