مصطفى الشادلي – كود سبور ////

الفيفا راسلات البارح الجمعة 6 ماي 2022 الاتحاد الجزائري لكرة القدم باش تقول ليه. لاربيط گاساما دار خدمتو وما أثراتش قراراتو على نتيجة الماتش اللي كان جمع بين الجزائر والكاميرون في باراج التأهل لمونديال قطر.

الفيفا كتبات ما يلي فمراسلتها اللي كشفات عليها صحف جزائرية “كنتأسفو لانو بالنسبة لتقديراتكم٬ يمكن يكون لقرارات لاربيط =گاساما= تأثير سلبي على الماتش. درسنا اللي جا فرسالتكم. نقدرو نقولو ليكم باللي كاع الحوادث اللي كانت فالماتش تفحصات مزيان من لاربيطات الفيديو وكلها راعات قوانين اللعبة وبروطوكول الفار”.

هاد الرد واضح. فيه باللي ماتش الجزائر والكاميرون ما غاديش يتعاود كيف كيحلمو الدزايريين. واضح باللي الاتهامات اللي طلقها مدرب الجزائر جمال بلماضي على لاربيط اتهامات باطلة ما عندها ساس ولا راس. واضح باللي غادي يتفعل متابعة لا المدرب ولا للي شكك فلاربيط وفالكاف وفالفيفا.

يعني الفيلم سالا وغاديين يعاقبو الجزائر. كنهدرو على اتحاد الكورة ومدربها.