عفراء علوي محمدي- كود//

الممرضون والممرضات المجازين ذوي سنتين من التكوين باقيين مصممين على التصعيد فمواجهة الحكومة، بعد عدة لقاءات داروها مع الفرق البرلمانية ومع المستشارين فالبرلمان، كان آخرها لقاءهم مع فريق العدالة والتنمية بالبرلمان نهار الثلاثاء.

التنسيقية الوطنية للممرضات والممرضين المجازين ذوي سنتين من التكوين قدمات لفريق حزب العدالة والتنمية، المترئس للحكومة، ملفها المطلبي، من اجل تسوية وضعيتهم الإدارية من خلال الترقية الاستثنائية لجميع الممرضين الموجزين من الدولة، كيف شددات على ان مشروع مرسوم وزارة الصحة ماكيستجبش لمطالبهم، بحكم انه حرمهم من الترقية الاستثنائية بأثر رجعي، والاقتصر على منحهم أقدمية اعتبارية لمدة عاماين.

فهذ الصدد، قال حسن التمارة، عضو فالمكتب الوطني للتنسيقية، والمكلف باللجنة الوطنية للمرضين فالاتحاد المغربي للشغل، أن الملف المطلبي ديال هذ الفئة عرف تعثر كبير من هذي 3 سنيت، وبقى يمشي من وزارة المالية للصحة والأمانة العامة بلا استجابة.

وزاد، فتصريحو ل”كود”، أنه فآخر حوار تسافطات مخرجاتو لوزارة الصحة، بلغهم انه تم الرفض ديالو ف12 ماي بسبب “تبريرات واهية”، واخا الوزارة مازال ماعطاتهم الفيدباك بانه ترفض وبقات تتماكل و”هذا اللي خلانا نديرو لقاءات مع الفرق البرلمانية باش نعرفو المآل ديال الملف”، حسب ما قال.

وبالنسبة للحلول اللي كتعطي الوزارة لهذ الملف، قال: “كيعطيونا ديما الفتات، حيت سنتين اعتبارية لا تغني ولا تسمن من جوع”.

وكشف التمارة أن فريق حزب العدالة والتنمية بالبرلمان عبر على مساندتو ليهم، وواعدهم بانه غيدير مراسلة لوزارة الصحة بهذ الخصوص.

وكشف أن الممرضين دارو حوارات قبل مع الفرق البرلمانية ديال الأحرار والأصالة والمعاصرة والاتحاد الاشتراكي، ودابا العدالة والتنمية، اللي كان دارو مع الفريق ديالو بمجلس المستشارين حوار.

وأكد أن التنسيقية ماغاديش تحبس من الاجتماعات واللقاءات، وتقدر تدوز لوقفات احتجاحية وإضرابات إلى حين تحقيق مطالبها.