كود الرباط//

المغرب مقبل على أكبر عملية للتلقيح فتاريخو، ولكن هاد العملية مافيهاش وضوح، للآسف المعلومة هي الغائبة.

لحدود اللحظة وزارة الصحة لي قررت تجيب جوج لقاحات (سينوفارم الصيني، واسترازينيكا ديال جامعة اوكسفورد)، مزال منشراتش نتائجهم السريرية فالمرحلة الثالثة.

لي كيعطي الرخص لاعتماد اللقاح، هي مديرية الأدوية والصيدلة، لي كترأسها بشرى مداح، لي تعينات في إطار “صفقة” داخل الوزارة، خصوصا وان مداح كانت محط شبهات بخصوص دخول مصل سيرولوجي للمغرب بدون شهادة التسجيل ل certificat d’enregistrement لي كاتمنح للشركات باش يجيبو الامصال من الخارج، ديك ساعة مداح سكتات ومبغاتش تجاوب “كود”، ودازت أيام وكافأها وزير الصحة واقترحها على المجلس الحكومي ودازت وتعينات ف المنصب ديال المديرية.

هادي خصها طير لسبب واحد، مكانتش واضحة مع المغاربة، تسترت على أهم حاجة كينص عليها الدستور، وأهم حق في الوجود، ولي هو الصحة العامة، خاص ناس تعرف علاش سينوفارم وعلاش استرازينيكا. وفين النتائج التجارب السريرية.

“كود” ربطت الاتصال أكثر من مرة بمديرية الأدوية، بل الوزارة وعدت بالرد على أسئلتنا، لكن بدون جواب لحدود اللحظة.

من غير المجهودات العلمية لي كيديرو خبراء مغاربة، فإن طريقة تدبير الوزارة لحملة التلقيح فيها الكثير من الغموض.

اسرائيل لقحت أزيد من مليون مواطن وقريبة تسالي، دول اخرى مشات بعيد، المغرب باقي فبلاصتو.

وزير الصحة دار ترخيص استثنائي لاسترازنيكا، ترخيص فيه أخطاء املائية وتكتب بطريقة غير علمية.

هاد جوج خصهم يطيرو، ويجيبو مسؤولين قادرين على تحمل المسؤولية. مسؤولين يصارحو المغاربة لأن هاد كتهم الصحة العامة وبالتالي الاقتصاد والاستقرار الاجتماعي.

لبارح البروفيسور عز الدين الابراهيمي، عضو اللجنة العلمية، خرج ودار صرخة وقال بصريحة العبارة :”كل الدول الغير المصنعة و المطورة للقاحات تمكنت من شرائها من خلال مضاربات تجارية كبيرة. فهناك دول اشترت اللقاحات ثلاث إلى خمس مرات ثمنها و منذ شهر يونيو. وكذلك جشع بعضها فكندا مثلا اشترت خمس مرات ما تحتاجه من جرعات…”.

الغريب في الأمر هو أن مديرية الأدوية صرحت لـ”كود” سابقا بأن لقاح سينوفارم هو من أفضل اللقاحات لي كاينا فالعالم. هادشي قالتو مزال كاع مخرجوش النتائج ديال التجارب السريرية فالمرحلة الثالثة.

بل اكثر من ذلك كاين خلافات بين اعضاء اللجنة العلمية حول اللقاحات، خصوصا اللقاح الصيني.