محمد سقراط – كود ///

العالم كامل كيقري باللغة ديالو وكيفتاخر بيها إلا المغاربة كيحتاقرو لوغتهم وكيعتابروها خاصة بالزنقة والتواصل مع الخضارة والعساسة ديال الطوموبيلات، أما لغة القراية بالنسبة ليهم هي عربية قريش ولا الفرنسية المستعمر سابقا الشريك الإقتصادي الاول لاحقا، أما الدارجة فبالنسبة ليهم محتقرة، وهادشي علاش نايضة روينة هاد ليام على ود المقرر الجديد حيت فكتاب العربية كاين أسماء ديال شهيوات مغربية بالدارجة، ولي أصلا معندهمش مرادف بالعربية أو لغة أخرى، ولي جزء من الهوية ديالنا، وكي العادة الناس خلات تناقش التعليم لي خارية عليه بكاع اللغات، ومشات تناقش بعد التفاصيل الصغيرة حول أسماء بعض الماكلات المغربية.

المغرب من الدول لي فالحضيض من ناحية التعليم، والتعليم العمومي كيمشي ليه بنادم غير بزز حيت مقودة عليه ومعندوش فلوس البريفي، والبريفي راه كاين لي غير  كيخبي فيه الواحد ولادو وكاين لي تعليم ديال بصح كتلقاه كيتقام شهريا بصالير ديال موظف، والعديد من المدارس الخاصة بحالها بحال المصحات الخاصة غير بلايص دال ابتزاز المواطن ويمصو ليه الدم ديالو حيت عارفين معندوش بديل، إذن واء تقراو هاد الدراري بالدارجة أو العربية فراه مكاينش الفرق بل العكس راه بجوجهم غير كيزيدو يكلخو حيت لغات بلا محتوى حاليا.

العربية لغة الجهل والأمية والتطرف والأصولية، والدارجة لغة الفقر والأحياء الشعبية والهامشية ولغة البسطاء والدراوش ولغة الزحف القروي، حيت حتى الدارجة المتمدنة ودارجة الديور لكبار راها قلالت وعوضاتها الفرونسي، لذا سواء قراو الأطفال البغرير أو الفطائر راه بحال بحال كلاخ فكلاخ، حيت العربية لغة حزق عليها الوقت والدارجة لغة الاميين فالمغرب، وبجوج محتواهم ضعيف فالأنترنيت، حيت فالوقت لي بزاف ديال البراهش كيعرفو يستعلو سمارتفون والطابليط، فراه من العبث إعتماد العربية أو الدارجة كلغة للتدريس، العالم كامل غادي جيهة الإنجليزية، وموالين الفلوس راه كيقريو ولادهم الصينية، وحنا باقين مضاربين على غربية والبطبوط، حقا الدارجة هي لغة الأم عند بزاف ديال لمغاربة وأصلا بيها كيقراو بزاف ديال المغاربة بالدارجة والامازيغية هي لغة التواصل فالقسم، ولكن راه حتى هي لهجة فقيرة ومرتابطة بطبقة إجتماعية معينة ماشي بالمغاربة كلهم.